নেশ্যনেল ডেস্ক, ২৬ জুলাই : ১৯৯৯ৰ ২৬ জুলাই, পাকিস্তানৰ সেনাৰ ভাৰতত প্ৰৱেশৰ দুঃসাহসৰ উচিত প্ৰত্যুত্তৰ দিছিল ভাৰতীয় সেনাই । ভাৰত ভূমিলৈ নিক্ষেপ কৰা কোপদৃষ্টিৰ পৰিণাম কিমান ভয়াৱহ হ'ব পাৰে তাৰ উমান পাইছিল পাকিস্তানে । ভাৰতীয় সেনাৰ গুলীত ধৰাশায়ী হৈছিল পাকিস্তানৰ ৩৫৭-৪৫৩ গৰাকী সেনা । দেশৰ গৰিমা, সুৰক্ষা অক্ষুণ্ণ ৰখাৰ বাবে জীৱন উছৰ্গা কৰিছিল ভাৰতৰ ৫২৭ গৰাকী বীৰ জোৱানে ।
১৯৯৯ চনৰ মে' মাহৰ পৰা জুলাই মাহ পৰ্যন্ত অব্যাহত থকা এই যুদ্ধত প্ৰাণ আহুতি দিয়া ভাৰতৰ বীৰ জোৱানসকলৰ প্ৰতি সন্মান জনাই প্ৰতি বছৰে ২৬ জুলাইত কাৰ্গিল বিজয় দিৱস উদযাপন কৰি অহা হৈছে । সোমবাৰে ২২ সংখ্যক কাৰ্গিল বিজয় দিৱসত বীৰ জোৱানসকলক শ্ৰদ্ধাৰে সুঁৱৰিছে দেশবাসীয়ে । সোমবাৰে ৰাষ্ট্ৰপতি ৰামনাথ কোবিন্দে কাৰ্গিলৰ দ্ৰাছ চেক্টৰত থকা কাৰ্গিল যুদ্ধ স্মাৰক পৰিদৰ্শন কৰি ১৯৯৯ চনৰ কাৰ্গিল যুদ্ধৰ সময়ত সশস্ত্ৰ বাহিনীয়ে প্ৰদৰ্শন কৰা অদম্য সাহস আৰু ত্যাগৰ প্ৰতি সন্মান জনাই শ্ৰদ্ধাঞ্জলি জ্ঞাপন কৰে ।
লগতে পঢ়ক: কাৰ্গিল বিজয় দিৱসৰ তাৎপৰ্য কি ?
১৯৯৯ চনৰ ১৩ জুনত টলোলিঙৰ যুদ্ধত পাকিস্তানী সেনাৰ বিৰুদ্ধে যুঁজ দি ভাৰতীয় সেনাই প্ৰথম বিজয় ধ্বজ্জা উৰুৱাবলৈ সক্ষম হৈছিল । এই বিজয় কাৰ্গিল যুদ্ধৰ এক টাৰ্ণিং পইণ্ট আছিল প্ৰতিৰক্ষা বিভাগৰ মুখ্য সেনাধ্যক্ষ জেনেৰেল বিপিন ৰাৱটৰ(Bipin Rawat) সোমবাৰে কাৰ্গিল বিজয় দিৱসৰ অনুষ্ঠানত অংশগ্ৰহণ । দেওবাৰে, তেওঁ নিৰাপত্তা ব্য়ৱস্থা পৰ্যালোচনাৰ বাবে দ্ৰাছ চেক্টৰ পৰিদৰ্শন কৰে ।
জেনেৰেল বিপিন ৰাৱটে প্ৰকৃত নিয়ন্ত্ৰণ ৰেখা, দ্ৰাছ চেক্টৰ পৰিদৰ্শন কৰে আৰু নিৰাপত্তা ব্যৱস্থা আৰু কাৰ্যকৰী প্ৰস্তুতিৰ বিষয়ে পৰ্যালোচনা কৰে । সেনাৰ সৈতেও তেওঁ বাৰ্তালাপ কৰে আৰু তেওঁলোকৰ সাহস তথা দেশৰ প্ৰতি আগবঢ়োৱা সেৱাৰ বাবে তেওঁলোকক প্ৰশংসা কৰে । সকলোকে দৃঢ় হৈ থাকিবলৈ ৰাৱটে আহ্বান জনায় । ভাৰতীয় সেনাৰ অতিৰিক্ত জন তথ্য সঞ্চালকালয়ে টুইটযোগে এই কথা প্ৰকাশ কৰে ।