নেশ্যনেল ডেস্ক,৩ মে' :বালাচোৰৰ দুৰ্ঘটনাৰ পাছত সমগ্ৰ ওড়িশাতে শোকাকুল পৰিৱেশে বিৰাজ কৰিছে (Balasore train accident)। প্ৰশাসনে উদ্ধাৰ আৰু সাহায্য অভিযান অব্যাহত ৰাখিছে । ইয়াৰ মাজতে দুৰ্ঘটনাত পতিত লোকসকলক সহায়ৰ বাবে আগবাঢ়ি আহিছে বিভিন্নজন । চিকিৎসা সাহায্যৰ বাবেও বহুলোক আগবাঢ়ি আহিছে ।
ইফালে মানৱীয়তাৰ অন্যতম নিদৰ্শন দাঙি ধৰিছে ওড়িশাবাসীয়ে । দুৰ্ঘটনাৰ পাছতে আহতসকলৰ চিকিৎসাৰ ক্ষেত্ৰত সহায় কৰিবলৈ বহুলোকে হাস্পতালত ভিৰ কৰিছে । স্বেচ্ছাই ৰক্তদানৰ বাবে বহুলোক বালাচোৰ আৰু ভদ্ৰক হাস্পতালত উপস্থিত হৈছে । নিশাই হাস্পতালসমূহে তেজৰ প্ৰায় ৫০০ ইউনিট সংগ্ৰহ কৰিছে । বৰ্তমান হাস্পতালত তেজৰ ৯০০ ইউনিট মজুত আছে বুলিও প্ৰশাসনে উল্লেখ কৰিছে (500 Units blood collected overnight at Balasore)। বালাচোৰ আৰু ভদ্ৰক হাস্পতালত আহতসকলৰ বাবে ৰক্তদান কৰিবলৈ বিভিন্নজনে গোটেই নিশা শাৰী পাতি থকাও দেখা গৈছে ।
উল্লেখ্য যে বালাচোৰৰ ভয়ংকৰ ৰে'ল দুৰ্ঘটনাত এতিয়ালৈ ২৩৮ গৰাকী লোকৰ মৃত্যু হৈছে যদিও মৃত্যুৰ সংখ্যা বৃদ্ধি হোৱাৰ সম্ভাৱনা আছে (238 death in Odisha train accident)। ৰাজ্য চৰকাৰে জনোৱা মতে ঘটনাস্থলীত উদ্ধাৰ অভিযান অব্যাহত আছে । এনডিআৰএফৰ ৭ টা দল, ওডিআৰএফৰ ৫ টা দল আৰু ২৪ টাকৈ অগ্নিনিৰ্বাপক বাহিনীৰ দলে উদ্ধাৰ অভিযান অব্যাহত ৰাখিছে । স্থানীয় আৰক্ষী, স্বেচ্ছাসেৱী সংস্থা আৰু স্থানীয় নাগৰিকসকলেও উদ্ধাৰ অভিযানত সহযোগিতা আগবঢ়াইছে ।