নেশ্যনেল ডেস্ক, 12 নৱেম্বৰ : বিহাৰৰ সদ্যঘোষিত বিধানসভা নিৰ্বাচনত সংখ্যাগৰিষ্ঠতা লাভ কৰিলে নেশ্যনেল ডেম'ক্ৰেটিক এলায়েন্সে (NDA) ৷ বৰ্তমান নতুনকৈ গঠন হ'বলগা চৰকাৰৰ ওপৰত সকলোৰে দৃষ্টি নিবদ্ধ ৷ দিপাৱলীৰ পাচৰ সপ্তাহত নতুন চৰকাৰ গঠন হোৱাৰ সম্ভাৱনা আছে ৷ সূত্ৰ অনুসৰি, জনতা দল ইউনাইটেডৰ (JNU) সভাপতি নিতিশ কুমাৰেই পুনৰবাৰ ৰাজ্যখনৰ মুখ্যমন্ত্ৰী হ'ব ৷
বিহাৰৰ দীৰ্ঘ সময়ৰ মুখ্যমন্ত্ৰীৰ পদত অধিষ্ঠিত হোৱাৰ দিশে আগবঢ়া নিতিশ কুমাৰে 16 নৱেম্বৰত শপত গ্ৰহণ কৰাৰ সম্ভাৱনা আছে ৷ আনহাতে, বৰ্তমানৰ চৰকাৰৰ কাৰ্যকালৰ অন্ত হোৱাৰ লগে লগে নৱেম্বৰৰ অন্তত কুমাৰে ৰাজ্যপালৰ হাতত পদত্যাগ পত্ৰ দাখিল কৰাৰ সম্ভাৱনা আছে ৷
বৰ্তমানলৈকে সূদীৰ্ঘ সময়ৰ বাবে বিহাৰৰ মুখ্যমন্ত্ৰী হিচাপে দায়িত্ব পালন কৰিছিল শ্ৰী কৃষ্ণ সিঙে ৷ তেওঁ 17 বছৰ 52 দিন বিহাৰৰ মুখ্যমন্ত্ৰী আছিল ৷ আনহাতে, বৰ্তমানলৈকে নিতিশ কুমাৰ 14 বছৰ আৰু 82 দিন মুখ্যমন্ত্ৰী হৈ আছে ৷
বিহাৰৰ মুখ্যমন্ত্ৰী হিচাপে কুমাৰে শপত গ্ৰহণ কৰা দিনসমূহ
*নিতিশ কুমাৰে (সমতা পাৰ্টিৰ সেইসময়ৰ নেতা) 2000 চনৰ 3 মাৰ্চত প্ৰথমবাৰৰ বাবে বিহাৰৰ মুখ্যমন্ত্ৰী হিচাপে শপত গ্ৰহণ কৰিছিল ৷ কিন্তু সংখ্যাগৰিষ্ঠতা লাভ কৰিবলৈ সক্ষম নোহোৱা বাবে পৰৱৰ্তী পৰ্যায়ত পদত্যাগ কৰিবলগা হৈছিল ৷
*2005 চনৰ 24 নৱেম্বৰত দ্বিতীয়বাৰৰ বাবে মুখ্যমন্ত্ৰী হিচাপে শপত গ্ৰহণ কৰিছিল ৷
*2010 চনৰ 26 নৱেম্বৰত তৃতীয়বাৰৰ বাবে মুখ্যমন্ত্ৰী হিচাপে শপত গ্ৰহণ কৰিছিল ৷