নেশ্যনেল ডেস্ক, ১৬ জুন : মুম্বাইৰ নিয়া(NIA)ৰ আদালতে মঙলবাৰে নান্দেদৰ এলইটি মডিউল (Nanded LeT module case) গোচৰত তিনিজন লস্কৰ-ই-তৈবা (LeT) সন্ত্ৰাসবাদীক ১০ বছৰৰ সশ্ৰম কাৰাদণ্ডৰ ঘোষণা কৰে । নিয়া(NIA)ৰ এগৰাকী বিষয়াই জনোৱা মতে মহম্মদ মোজাম্মিলক ভাৰতীয় দণ্ডবিধি আইন(IPC) আৰু ইউএপিএৰ(UAPA) সংশ্লিষ্ট ধাৰাৰ অধীনত ১০ বছৰৰ সশ্ৰম কাৰাদণ্ড আৰু অস্ত্ৰ আইনৰ কেইবাটাও ধাৰাৰ অধীনত পাঁচ বছৰৰ বাবে দণ্ডিত কৰাৰ উপৰিও ৫,০০০ টকাৰ জৰিমনা আৰোপ কৰে । আনহাতে আদালতে মহম্মদ চাদিক আৰু মহম্মদ আক্ৰামক ১০ বছৰৰ সশ্ৰম কাৰাদণ্ড প্ৰেৰণ কৰে ।
উল্লেখ্য যে এ টি এছ(ATS) মুম্বাইয়ে ২০১২ চনৰ ৩১ আগষ্টত অভিযুক্ত কেইজনক গ্ৰেপ্তাৰ কৰাৰ লগতে আগ্নেয়াস্ত্ৰ উদ্ধাৰ সম্পৰ্কীয় অস্ত্ৰ আইনৰ অধীনত এটা গোচৰ পঞ্জীয়ন কৰিছিল । প্ৰাৰম্ভিক অনুসন্ধানত প্ৰকাশ পোৱা মতে অভিযুক্ত কেইজনে নিষিদ্ধ সন্ত্ৰাসবাদী সংগঠন লস্কৰ-ই-তৈবা আৰু হৰকত-উল-জিহাদ-ই-ইছলামী (HUJI)ৰ সদস্য আছিল । ইয়াৰ পিছতে ২০১৩ চনৰ ২৪ জুনত নিয়াই তদন্তৰ দায়িত্ব গ্ৰহণ কৰে ।