নিউজ ডেস্ক, ৭ ছেপ্টেম্বৰ :বহু প্ৰতীক্ষিত দিল্লী জি-২০ সন্মিলন দুৱাৰদলিত । বিশ্ব নেতাসকলক স্বাগমত জনাবলৈ সকলো প্ৰকাৰে সাজু হৈছে দেশৰ ৰাজধানী । কটকটীয়া সুৰক্ষা ব্যৱস্থাৰ পৰা অতিথি আপ্যায়ণলৈকে ক'তো একো খুঁত ৰখা নাই জি-২০ৰ সভাপতি ভাৰতে । আনহাতে, শুকুৰবাৰে আমেৰিকা যুক্তৰাষ্ট্ৰৰ ৰাষ্ট্ৰপতি জো বাইডেনক জি-২০ সন্মিলনৰ বাবে আদৰণি জনাবলৈ সম্পূৰ্ণ সাজু হৈছে নতুন দিল্লী । ভাৰতৰ সভাপতিত্বৰ অধীনত এই জি-২০ সন্মিলনক এক ঐতিহাসিক সন্মিলন হিচাপে গণ্য কৰা হৈছে । আইটিচি মৌৰ্য শ্বেৰাটন হোটেলৰ চৌদিশে নিৰাপত্তা ব্যৱস্থা কটকটীয়া কৰা হৈছে । উল্লেখ্য যে এইখন হোটেলতে থাকিব বিশ্বৰ শক্তিধৰ দেশ আমেৰিকাৰ ৰাষ্ট্ৰপতি বাইডেন ।
সূত্ৰ অনুসৰি, ৰাষ্ট্ৰপতি জো বাইডেন আৰু তেওঁৰ সৈতে অহা প্ৰতিনিধিসকলৰ বাবে হোটেলখনৰ ৪০০ টা কোঠা বুকিং কৰা হৈছে । এই হোটেলখনে পূৰ্বতে আমেৰিকাৰ প্ৰাক্তন ৰাষ্ট্ৰপতি জৰ্জ ডব্লিউ বুছ, বিল ক্লিণ্টন আৰু বাৰাক অ'বামাৰ লগতে অন্যান্য ৰাষ্ট্ৰপ্ৰধানসকলকো আতিথ্য প্ৰদান কৰিছিল । নিৰাপত্তাৰ বাবে এই আইকনিক বিলাসী হোটেলখনৰ প্ৰতিটো মহলাত জো বাইডেনৰ ছিক্ৰেট ছাৰ্ভিচ কমাণ্ডো মোতায়েন কৰা হ'ব । তদুপৰি, ৰাষ্ট্ৰপতিক তেওঁৰ দুটা শোৱনিকোঠাৰ গ্ৰেণ্ড প্ৰেছিডেন্সিয়েল ছুইটলৈ লৈ যোৱাৰ বাবে এটা বিশেষ এলিভেটৰৰ ব্যৱস্থা কৰা হৈছে ।
ইয়াৰ উপৰি নিৰাপত্তা ব্যৱস্থাৰ কথা মনত ৰাখি বিশ্বৰ আটাইতকৈ ব্যয়বহুল গাড়ী, উন্নত অস্ত্ৰ, বোমা ডিটেক্টৰ, এটা নিয়ন্ত্ৰণ কক্ষ আৰু এক সমান্তৰাল যোগাযোগ ব্যৱস্থাও কৰা হৈছে । উল্লেখ্য যে আমেৰিকা যুক্তৰাষ্ট্ৰৰ ৰাষ্ট্ৰপতি জো বাইডেনে শুকুৰবাৰে জি-২০ সন্মিলনৰ সমান্তৰালভাৱে প্ৰধানমন্ত্ৰী নৰেন্দ্ৰ মোদীৰ সৈতে এক দ্বিপাক্ষিক বৈঠকতো মিলিত হ'ব ।
সৰু মডুলাৰ পাৰমাণৱিক ৰিয়েক্টৰ, ভাৰতীয় শিক্ষাৰ্থীসকলৰ বাবে নিৰ্মিত এক বিশেষ শৈক্ষিক কাৰ্যসূচী, ড্ৰোন চুক্তিত অগ্ৰগতি, জেট ইঞ্জিনজড়িত প্ৰতিৰক্ষা চুক্তিৰ বাবে আমেৰিকা যুক্তৰাষ্ট্ৰৰ কংগ্ৰেছৰ অনুমোদনৰ দিশত অগ্ৰগতি, ইউক্ৰেইনৰ বাবে যুটীয়া মানৱীয় সাহায্য আৰু দুয়োখন ৰাষ্ট্ৰতে নতুন কনছুলেট স্থাপন দুয়োগৰাকী নেতাৰ মাজত দ্বিপাক্ষিক বৈঠকৰ কাৰ্যসূচীত আছে বুলি সূত্ৰত প্ৰকাশ ।