নিউজ ডেস্ক, ৯ জানুৱাৰী:নাৰ্কটিক্স কণ্ট্ৰ’ল ব্যুৰো চমুকৈ এনচিবিয়ে (Narcotics Control Bureau) পঞ্জাৱৰ লুধিয়ানাত সোমবাৰে এটা বৃহৎ আন্তঃৰাষ্ট্ৰীয় ড্ৰাগছ চক্ৰক উৎখাত কৰে ৷ অভিযানকাৰী দলটোৱে আফগান নাগৰিকসকলে হেৰ’ইনৰ প্ৰক্ৰিয়াকৰণ কৰা দুটা পৰীক্ষাগাৰো জব্দ কৰে । এই ড্ৰাগছ চক্ৰটোৰ ডুবাই, পাকিস্তান, আফগানিস্তানৰ উপৰি উত্তৰ ভাৰতৰ কেইবাখনো ৰাজ্যৰ সৈতে সম্পৰ্ক থকাৰ কথা জানিবলৈ দিয়ে এনচিবিৰ উপ-সঞ্চালক প্ৰধান জ্ঞানেশ্বৰ সিঙে (NCB deputy director general Gyaneshwar Singh) ৷ তেওঁ ড্ৰাগছৰ ব্যৱসায়ৰ পৰা লাভ কৰা ধন এই চক্ৰটোৱে কেইবাটাও বৈধ ব্যৱসায়ত বিনিয়োগ কৰাৰ কথাও ব্যক্ত কৰে ।
এনচিবিৰ চণ্ডীগড় আঞ্চলিক শাখাই ড্ৰাগৰ আন্তঃৰাষ্ট্ৰীয় চক্ৰৰ (International drug syndicate) বিৰুদ্ধে পঞ্জাৱত এক বিশেষ অভিযান চলোৱা পিচত এই অভিযান চলাইছিল । ২০২২ চনৰ এপ্ৰিলত এনচিবিয়ে গোচৰ ৰুজু কৰা শ্বাহিন বাগ আৰু মুজাফৰনগৰ গোচৰৰ সৈতে এই নেটৱৰ্কৰ উমৈহতীয়া সম্পৰ্ক থকাৰ কথা তদন্তত পোহৰলৈ আহে ৷ নাৰ্কটিক্স কণ্ট্ৰ’ল ব্যুৰ’ চণ্ডীগড় গোটে এই চক্ৰটো উৎখাত কৰাৰ লগতে তেওঁলোকৰ গোটেই শৃংখলাটো সম্পূৰ্ণৰূপে উদঘাটন কৰাৰ কথা জানিবলৈ দিয়ে এনচিবিৰ উপ-সঞ্চালক প্ৰধান জ্ঞানেশ্বৰ সিঙে ৷
এনচিবিয়ে ইয়াৰ পূৰ্বে, ১৫ নৱেম্বৰত লুধিয়ানাৰ সন্দীপ সিঙৰ পৰা ২০.৩২৬ কিলোগ্ৰাম হেৰ’ইন জব্দ কৰাৰ কথাও উল্লেখ কৰে জ্ঞানেশ্বৰ সিঙে ৷ বিভিন্ন আন্তঃৰাষ্ট্ৰীয় সংস্থাৰ সহযোগিতাত এনচিবিৰ বিভিন্ন শাখা, পঞ্জাৱ আৰক্ষীৰ বিশেষ দলৰ লগতে বিভিন্ন কেন্দ্ৰীয় সংস্থাই এই অভিযানত গুৰুত্বপূৰ্ণ ভূমিকা পালন কৰাৰ কথাও উল্লেখ কৰে উপ-সঞ্চালক প্ৰধান জ্ঞানেশ্বৰ সিঙে ৷ এই অভিযানত NIDAAN আৰু ICJS সহায় লোৱা হৈছিল । তেওঁলোকৰ সহযোগত নৱেম্বৰৰ পৰা বৰ্তমানলৈ এই আন্তঃৰাষ্ট্ৰীয় ড্ৰাগছ চক্ৰটোৰ প্ৰায় ১৩ টাক গ্ৰেপ্তাৰ কৰা হৈছে ।