নিউজ ডেস্ক, ২ মাৰ্চ : ২৭ ফেব্ৰুৱাৰীত মুঠ ৬০ খন আসনৰ ভিতৰত ৫৯ খনত প্ৰতিদ্বন্দ্বিতা কৰা ১৮৩ জন প্ৰাৰ্থীৰ ভৱিষ্যতৰ বাবে বৃহস্পতিবাৰে পুৱা ৮ বজাৰ পৰা নাগালেণ্ড বিধানসভা নিৰ্বাচনৰ ভোটগণনা আৰম্ভ হৈছে (Nagaland Assembly polls votes counting 2023) । উল্লেখ্য, এইবাৰৰ নাগালেণ্ড বিধানসভা নিৰ্বাচনত 83%-তকৈও অধিক ভোটাৰে তেওঁলোকৰ ভোটাধিকাৰ সাব্যস্ত কৰে । আনহাতে, ভাৰতীয় নিৰ্বাচন আয়োগে (Election Commission of India) ভোটগণনা প্ৰক্ৰিয়াৰ শুদ্ধতা আৰু স্বচ্ছতা নিশ্চিত কৰিবলৈ গণনা পৰ্যবেক্ষক আৰু সাধাৰণ পৰ্যবেক্ষক নিয়োগ কৰিছে ।
ইফালে ৰাজ্যখনত ভোটগণনা প্ৰক্ৰিয়াৰ বাবে তিনিতৰপীয়া নিৰাপত্তা ব্যৱস্থা গ্ৰহণ কৰা হৈছে । ইয়াৰ ভিতৰত আছে প্ৰতিদ্বন্দ্বিতা কৰা প্ৰাৰ্থী, ৰিটাৰ্ণিং বিষয়া আৰু পৰ্যবেক্ষকৰ উপস্থিতিত ভোটগণনা কেন্দ্ৰলৈ পৰিবহণ কৰা ইভিএমবোৰৰ চিচি টিভি নিৰীক্ষণ । সমগ্ৰ ৰাজ্যখনতে মুঠ 16 টা ভোটগণনা কেন্দ্ৰ স্থাপন কৰা হৈছে । আনহাতে, প্ৰতিটো বিধানসভা সমষ্টিৰ ভোট গণনাৰ বাবে পৃথক পৃথক গণনা টেবুলৰ ব্যৱস্থা কৰা হৈছে (Nagaland Assembly Election 2023) ।
ভোটগণনা আৰম্ভ হয় ডাক বেলট পেপাৰৰ গণনাৰে । তাৰ আধা ঘণ্টা পিছত ইভিএমবোৰ খোলা হয় । নিৰ্বাচন আয়োগে ইভিএম ষ্ট্ৰং ৰুম সুৰক্ষিত কৰিবলৈ বৃহৎ সংখ্যক কৰ্মচাৰী নিয়োগ কৰিছে, য'ত ভোটিং মেচিনবোৰ আজিলৈকে ৰখা হৈছে । নেচনেল ডেম'ক্ৰেটিক প্ৰগ্ৰেছিভ পাৰ্টী (National Democratic Progressive Party, NDPP)-ভাৰতীয় জনতা পাৰ্টীৰ (BJP) মিত্ৰজোঁটে দ্বিতীয়বাৰৰ বাবে শাসনৰ বাঘজৰী লোৱাৰ প্ৰবল সম্ভাৱনা আছে । তেনেহ'লে পুনৰবাৰ ৰাজ্যখনৰ মুখ্যমন্ত্ৰিত্বৰ দায়িত্ব নেফিউ ৰিঅ'ৰ কান্ধত পৰিব (Nagaland Chief Minister Neiphiu Rio) ।