ৱাৰ্ডবয়ে অক্সিজেন মাস্ক খুলি দিয়াত ক’ভিড ৰোগীৰ মৃত্যু

এগৰাকী ক'ৰণা ৰোগীৰ মৃত্যুৰ পাচতে পৰিস্থিতি উত্তপ্ত হৈ পৰে মধ্য প্ৰদেশৰ শিৱপুৰী জিলা চিকিৎসালয়ত ৷ COVID ৱাৰ্ডত চিকিৎসা কৰ্মীয়ে অক্সিজেন মাস্ক আঁতৰাই দিয়াৰ ফলতে ৰোগীৰ মৃত্যু হয় বুলি অভিযোগ কৰে পৰিয়ালৰ লোকে ৷

নেশ্যনেল ডেস্ক, 15 এপ্ৰিল :মধ্য প্ৰদেশৰ শিৱপুৰী জিলা চিকিৎসালয়ত উত্তপ্ত পৰিস্থিতি ৷ এগৰাকী ক'ৰণা ৰোগীৰ মৃত্যুৰ পাচতে পৰিস্থিতি উত্তপ্ত হৈ পৰে জিলা চিকিৎসালয়খনৰ ৷ ৰোগী গৰাকীৰ পৰিয়ালৰ অভিযোগ অনুসৰি COVID ৱাৰ্ডত চিকিৎসা কৰ্মীয়ে অক্সিজেন মাস্ক আঁতৰাই দিয়াৰ ফলতে ৰোগী গৰাকীৰ মৃত্যু হয় ৷ সুৰেন্দ্ৰ শৰ্মা নামৰ শিক্ষক গৰাকীৰ মৃত্যু স্বাভাৱিক বুলি চিকিৎসালয় কৰ্তৃপক্ষই সদৰি কৰিছে যদিও পৰিয়ালৰ লোকে নামি লোৱা নাই ৷ চিকিৎসালয়খনৰ অধীক্ষক ডাঃ কেবি বাৰ্মাই ৰোগী গৰাকীৰ পৰা অক্সিজেন মাস্ক আঁতৰোৱা হোৱা নাছিল বুলি উল্লেখ কৰাৰ পাচতে পৰিয়ালৰ লোকে চিচি টিভি ফুটেজ নিৰীক্ষণ কৰিব বুলি উল্লেখ কৰে ৷

ক'ৰণা ৰোগীৰ মৃত্যুৰ পাচতে উত্তপ্ত পৰিস্থিতি মধ্য প্ৰদেশৰ জিলা চিকিৎসালয়ত

ইফালে চিচি টিভি ফুটেজত স্পষ্ট ভাৱে চিকিৎসা কৰ্মীয়ে অক্সিজেন আঁতৰোৱা দেখাৰ লগে লগে চিকিৎসালয় প্ৰশাসনে স্থিতি সলনি কৰি কয় যে, ৰোগী গৰাকীক অক্সিজেনৰ প্ৰয়োজন নাছিল ৷ সেয়েহে নাৰ্চৰ নিৰ্দেশত ৱাৰ্ড বয় জনে আন এজন ৰোগীৰ বাবে অক্সিজেন মাস্কখন খুলি দিছিল ৷ চিকিৎসালয় খনৰ কৰ্তৃপক্ষৰ দুটা স্থিতিয়ে এতিয়া চাঞ্চল্যৰ সৃষ্টি কৰিছে সমগ্ৰ জিলাখনত ৷ লগতে ৰোগী গৰাকীৰ পৰিয়ালৰ লোকে ঘটনা সন্দৰ্ভত তদন্তৰ দাবী জনায় ৷

আনহাতে, মৃতকৰ পৰিয়ালে বিষয়টোৰ তদন্তৰ বাবে আহ্বান জনোৱাৰ পাচতে চিকিৎসা মহাবিদ্যালয়ৰ অধীক্ষক ডাঃ অক্ষয় নিগমে বিষয়টো তদন্তৰ বাবে এটা দল গঠন কৰিবলৈ নিৰ্দেশ দিছে ৷ আগন্তুক 48 ঘন্টাৰ ভিতৰত মৃত্যুৰ প্ৰতিবেদন দখিল কৰাৰ বাবে শিৱপুৰী জিলা চিকিৎসালয়লৈ নিৰ্দেশ প্ৰেৰণ কৰিছে ৷ ইতিমধ্যে এছপি ৰাজেশ সিং চান্দেলসহ কালেক্টৰ অক্ষয় কুমাৰ সিং ঘটনাস্থলীত উপস্থিত হৈ পৰিস্থিতিৰ বুজ লয় ৷

লগতে পঢ়ক:কৰ'ণাৰ বাবে মহাৰাষ্ট্ৰত কঠোৰ নিষেধাজ্ঞা