নৱবৰ্ষৰ পুৱাই শোকাৱহ দুৰ্ঘটনা, ৬ গৰাকী যাত্ৰী নিহত

6 killed in Jharkhand accident: নতুন বছৰৰ আৰম্ভণিৰ দিনটোতে ঝাৰখণ্ডৰ জামছেদপুৰত যাত্ৰীভৰ্তি বাহন দুৰ্ঘটনাত পতিত । বনভোজলৈ যোৱা এখন বাহন দুৰ্ঘটনাত পতিত হৈ ৬ গৰাকী লোকৰ মৃত্যু । দুজন গুৰুতৰভাৱে আহত ।

নেশ্যনেল ডেস্ক,১ জানুৱাৰী :নৱবৰ্ষৰ প্ৰথম দিনটোতে আহিছে এক বেয়া খবৰ ৷ বছৰৰ প্ৰথমটো দিনতে ঝাৰখণ্ডত শোকাৱহ দুৰ্ঘটনা সংঘটিত হৈছে । জামছেদপুৰত পুৱাই সংঘটিত এক দুৰ্ঘটনাত ৬ গৰাকী লোক নিহত হোৱাৰ লগতে দুজন আহত হয় । আহত লোককেইজনক টাটা মুখ্য চিকিৎসালয়ত ভৰ্তি কৰোৱা হৈছে । জানিব পৰা মতে বিষ্টুপুৰ আৰক্ষী থানা এলেকাত দুৰ্ঘটনাটো সংঘটিত হয় ।

সূত্ৰৰ মতে আৰআইটি আৰক্ষী থানাৰ অন্তৰ্গত একাংশ লোকে বাহনখনেৰে বনভোজৰ বাবে গৈছিল । কিন্তু সেই বাহনখন বিষ্টুপুৰ আৱৰ্ত ভৱনৰ সমীপত নিয়ন্ত্ৰণহীন হৈ এডাল গছত খুন্দা মাৰে । ফলত ঘটনাস্থলীতে ৫ গৰাকী যাত্ৰীৰ মৃত্যু হয়। আনহাতে চিকিৎসালয়ত এগৰাকী যাত্ৰীৰ মৃত্যু হয় । আহত দুগৰাকী চিকিৎসাধীন হৈ আছে বুলি জানিব পৰা গৈছে ।

আৰক্ষীয়ে জনোৱা মতে, সোমবাৰে পুৱা প্ৰায় ৪.৩০ বজাত আদিত্যপুৰৰ আৰআইটি আৰক্ষী থানাৰ অন্তৰ্গত বাবা আশ্ৰমৰ ৮ গৰাকী লোক বনভোজলৈ গৈ থকাৰ সময়তে এই দুৰ্ঘটনাটো সংঘটিত হয় । বাহনখনৰ গতি বেগ বেছি আছিল বুলি জানিব পৰা গৈছে । ঘটনাটোৰ খবৰ পোৱাৰ পিচতে বিষ্টুপুৰ আৰক্ষী ঘটনাস্থলীত উপস্থিত হয় । বাহনখনত আৱদ্ধ লোকসকলক উদ্ধাৰ কৰা হয় ।

আৰক্ষীৰ মতে ৫ গৰাকী লোকৰ থিতাতে মৃত্যু হয় । মৃতসকলক সুৰজ চাহু, টুকটুক, শুভম, মনু, হেমন্ত আৰু ছোটু যাদৱ বুলি চিনাক্ত কৰা হৈছে । আহতসকলক ৰবি ঝা আৰু হৰ্ষ ঝা বুলি চিনাক্ত কৰা হৈছে । দুৰ্ঘটনাটোৰ খবৰ পোৱাৰ পাছতে আদিত্যপুৰৰ আৰআইটিৰ বাবা আশ্ৰমত শোকাকুল পৰিৱেশে বিৰাজ কৰিছে ।

লগতে পঢ়ক :কিশোৰীক ধৰ্ষণৰ অপচেষ্টা, পানীৰ টেংকীত ডুবাই শিলেৰে থেতেলিয়াই হত্যা