নিউজ ডেস্ক, 19 জুন :মণিপুৰত সংঘটিত হিংসাত্মক ঘটনাসমূহ শাম নকটাৰ পৰিপ্ৰেক্ষিতত সোমবাৰে সংঘৰ্ষগ্ৰস্ত ৰাজ্যখনৰ শ শ মেইটেই মহিলাই ৰক্তপাত বন্ধ কৰাৰ বাবে প্ৰধানমন্ত্ৰী নৰেন্দ্ৰ মোদীৰ হস্তক্ষেপৰ দাবীত দিল্লীৰ ৰাজপথলৈ ওলাই আহি প্ৰতিবাদ সাব্যস্ত কৰে ।
খোৱাইৰামবাম ইমা কিথাল যুটীয়া সমন্বয় সমিতিক প্ৰতিনিধিত্ব কৰা উত্তেজিত মহিলাসকলেও গৃহমন্ত্ৰী অমিত শ্বাহে ঘোষণা কৰা অনুসৰি ১০ লাখ টকাৰ আৰ্থিক ক্ষতিপূৰণ প্ৰত্যাখ্যান কৰে । "আমি ক্ষন্তেকীয়া ক্ষতিপূৰণ নিবিচাৰোঁ । আমি টকাৰে কি কৰিম ? আমি প্ৰধানমন্ত্ৰী নৰেন্দ্ৰ মোদীক বিষয়টোত হস্তক্ষেপ কৰিবলৈ অনুৰোধ জনাইছো যাতে হিংসা তৎক্ষণাৎ সমাপ্ত হয়," সমিতিৰ এজন সদস্য লিকলাঙে কয় ।
গৃহমন্ত্ৰী অমিত শ্বাহে তেওঁৰ শেহতীয়া মণিপুৰ ভ্ৰমণৰ সময়ত চলিত হিংসাত নিহত সকলৰ পৰিয়ালৰ আত্মীয়সকলক ১০ লাখ টকাৰ ক্ষতিপূৰণ ঘোষণা কৰিছিল য'ত 3 মে ৰ পৰা এই পৰ্যন্ত ১০০ ৰো অধিক লোক নিহত হৈছে । "যদিও মণিপুৰে ৪৫ দিনৰো অধিক সময় ধৰি আটাইতকৈ ভয়ংকৰ সাম্প্ৰদায়িক বিপৰ্যয়ৰ সন্মুখীন হৈ আহিছে, তথাপিও প্ৰধানমন্ত্ৰীৰ মণিপুৰ ভ্ৰমণ কৰিবলৈ সময় নাই আৰু আনকি তেওঁ এটা শব্দও কোৱা নাই । যিহেতু তেওঁৰ মণিপুৰ ভ্ৰমণ কৰিবলৈ সময় নাই, আমি, খোৱাইৰামবাম ইমা কিথাল যুটীয়া সমন্বয় সমিতিৰ ৭৫ গৰাকী মহিলা প্ৰতিনিধি প্ৰধানমন্ত্ৰীক সাক্ষাৎ কৰিবলৈ দিল্লীলৈ আহিছো," সমিতিৰ আন এগৰাকী সদস্য ইমান জানু বেহুমে কয় ৷
মণিপুৰৰ মহিলা প্ৰতিনিধিসকলে গৃহমন্ত্ৰী অমিত শ্বাহক "ৰাজ্যখনত বিভাজন আৰু শাসন নীতি খেলা" বুলিও সমালোচনা কৰে । "আমি শেহতীয়াকৈ গৃহমন্ত্ৰী আৰু নাগা আৰু কুকি বিধায়কসকলৰ মাজত হোৱা বৈঠকক গৰিহণা দিছো । গৃহমন্ত্ৰীয়ে এছওও ৰ অধীনত কুকি সশস্ত্ৰ গোটসমূহক নিয়ন্ত্ৰণ কৰাত আৰু ৰাজ্যখনত তিনিদিন অতিবাহিত কৰা স্বত্বেও স্বাভাৱিক অৱস্থা ঘূৰাই অনাত ব্যৰ্থ হোৱাৰ ফলত মণিপুৰৰ লোকসকল অধিক শংকিত হৈ পৰিছে," সমিতিখনে কয় ।
তেওঁলোকে অভিযোগ কৰে যে অসম ৰাইফলছ আৰু ৰেপিড একচন ফ'ৰ্চকে ধৰি কেন্দ্ৰীয় সুৰক্ষা বাহিনীয়ে পালন কৰা পক্ষপাতিত্বমূলক ভূমিকাই পৰিস্থিতি আৰু বেয়া কৰি তুলিছে । "কেন্দ্ৰীয় সুৰক্ষা বাহিনীৰ এটা অংশক নিয়মীয়াকৈ ৰাজ্যিক আৰক্ষী বাহিনীৰ স্বাভাৱিক কাৰ্যকলাপত বাধা দিয়া দেখা যায় । তেওঁলোকে কুকি সশস্ত্ৰ দুৰ্বৃত্তসকলক দমন কৰাৰ নামত কুকিসকলৰ পক্ষ লৈছে আৰু মূক দৰ্শকৰ ভূমিকা লৈ আছে বুলি জানিব পৰা গৈছে" এই অভিযোগ যুটীয়া সমন্বয় সমিতিৰ ।
প্ৰধানমন্ত্ৰীৰ কাৰ্যালয়ত দাখিল কৰা এখন স্মাৰকপত্ৰত খোৱাইৰামবাম ইমা কিথাল যুটীয়া সমন্বয় সমিতিয়ে মোদীক ত্ৰিপাক্ষিক এছওও প্ৰত্যাহাৰ কৰি বৰ্তমানৰ হিংসাৰ বাবে কুকি উগ্ৰপন্থীসকলক দায়বদ্ধ কৰিবলৈ আহ্বান জনায় । "কুকি উগ্ৰপন্থীৰ সৈতে অভিযান স্থগিত ৰখাৰ পিছত ভাৰত চৰকাৰে সশস্ত্ৰ মেইটেই যুৱক-যুৱতীসকলক নিৰস্ত্ৰ কৰাটো নিশ্চিত কৰিব লাগিব" বুলিও সমিতিখনে মতপোষণ কৰে ।
লগতে পঢ়ক :Manipur Violence : মণিপুৰত হাতত জোঁৰ লৈ বৃহৎ মানৱ শৃংখল
