নিউজ ডেস্ক, ২৬ জুন : পশ্চিমবংগত পঞ্চায়ত নিৰ্বাচনৰ প্ৰচাক কাৰ্য তুংগত উঠিছে । সোমবাৰে পঞ্চায়ত নিৰ্বাচনৰ প্ৰচাৰ কাৰ্যত অংশগ্ৰহণ কৰি মোদীৰ ওপৰত তীব্ৰ আক্ৰমণ কৰে মমতা বেনাৰ্জীয়ে । পঞ্চায়ত নিৰ্বাচনৰ প্ৰচাৰৰ সময়তে তৃণমূল কংগ্ৰেছৰ শীৰ্ষ নেত্ৰী তথা পশ্চিমবংগৰ মুখ্যমন্ত্ৰী মমতা বেনাৰ্জীয়ে প্ৰধানমন্ত্ৰী নৰেন্দ্ৰ মোদীৰ শেহতীয়া আমেৰিকা ভ্ৰমণক তীব্ৰ সমালোচনা কৰে । মমতাই অভিযোগ কৰে যে প্ৰধানমন্ত্ৰী মোদীয়ে দেশৰ ধন শৰাধ কৰি বিশ্বনেতা হ'বলৈ আমেৰিকা ভ্ৰমণ কৰিছে ।
উল্লেখ্য, ৰাজ্যখনত অহা ৮ জুলাইত অনুষ্ঠিত হ'ব পঞ্চায়ত নিৰ্বাচন । মমতা বেনাৰ্জীয়ে সোমবাৰে পঞ্চায়ত নিৰ্বাচনৰ বাবে নিজৰ প্ৰচাৰ কাৰ্য আৰম্ভ কৰে । তেওঁ কোচবিহাৰৰ চান্দামাৰী প্ৰাণনাথ হাইস্কুলৰ খেলপথাৰত এখন ৰাজহুৱা সভাৰ জৰিয়তে তেওঁৰ প্ৰচাৰ অভিযান আৰম্ভ কৰে । তৃণমূলৰ নেত্ৰীগৰাকীয়ে তেওঁৰ স্বভাৱসিদ্ধ ভাষাৰে জনসভাৰ মঞ্চৰ পৰা বিজেপিক লক্ষ্য কৰি লয় । তেওঁ কেন্দ্ৰৰ ওপৰত বঞ্চনাৰ অভিযোগ উত্থাপন কৰে ।
মমতাই এইটোও দাবী কৰে যে বিজেপিয়ে কেন্দ্ৰীয় প্ৰকল্পৰ বাবে পুঁজি বন্ধ কৰি ৰাখিছে । এই অভিযোগ উত্থাপন কৰিবলৈ গৈ মমতাই প্ৰধানমন্ত্ৰী নৰেন্দ্ৰ মোদীৰ আমেৰিকা ভ্ৰমণৰ বিষয়টো উত্থাপন কৰে । "তেওঁলোকে চৰকাৰৰ ধন শৰাধ কৰিবলৈ আমেৰিকালৈ গৈছে । সেয়া কেৱল ধন অপচয়ৰ বাহিৰে আন একো নহয় । ২৪ হাজাৰ আমেৰিকান ডলাৰ বা বিলিয়ন ডলাৰ অপচয় কৰিছে । আমেৰিকাক সন্তুষ্ট কৰিবলৈহে তেওঁ আমেৰিকালৈ গৈছে । মোদী বাবু নেতা হ'ব ।" মমতা বেনাৰ্জীয়ে তাচ্ছিল্য কৰি কয় ।