নেশ্যনেল ডেস্ক,১৪ জুলাই : চলিত বৰ্ষৰ ৩০ জুনৰ পৰা অমৰনাথ যাত্ৰা ২০২২ আৰম্ভ হৈছিল (Amarnath Yatra 2022 started on June 30) ৷ তেতিয়াৰে পৰা প্ৰতিদিনে হাজাৰ হাজাৰ লোকৰ আগমন হোৱা দেখা গৈছে । কিন্তু প্ৰতিকূল বতৰৰ বাবে সাময়িকভাৱে বন্ধ কৰি দিয়া হৈছিল এই অমৰনাথ যাত্ৰা । যাত্ৰা আৰম্ভ হোৱাৰ কিছুদিন পাছতে ভূমিস্খলন আৰু ডাৱৰ বিস্ফোৰণৰ ফলত কেইবাগৰাকী ভক্তৰ মৃত্যু হৈছে (Cloudburst affects Amarnath Yatra 2022)। অৱশ্যে শেহতীয়াকৈ পৰিস্থিতি উন্নত হোৱাৰ পাছত অমৰনাথ যাত্ৰা পুনৰ আৰম্ভ হয় ।
ইয়াৰ মাজতে অমৰনাথ যাত্ৰাৰ সময়ত ভক্তৰ মৃত্যু হোৱাক লৈ প্ৰতিক্ৰিয়া প্ৰকাশ কৰিছে অমৰনাথৰ চাৰি মুবাৰকৰ ৰক্ষক মহন্ত দীপেন্দ্ৰ গিৰিয়ে । অমৰনাথ যাত্ৰাৰ সময়ত ল'বলগীয়া সাৱধানতা সম্পৰ্কে উল্লেখ কৰে মহন্ত দীপেন্দ্ৰ গিৰিয়ে । লগতে জম্মু-কাশ্মীৰ প্ৰশাসনক ভক্তৰ সুৰক্ষাৰ যাৱতীয় ব্যৱস্থা গ্ৰহণ কৰিবলৈ আহ্বান জনায় ।
জলাশয় আৰু নলাৰ কাষত ভক্তসকলৰ বাবে অস্থায়ী পথ নিৰ্মাণ নকৰিবলৈ সংশ্লিষ্ট কৰ্তৃপক্ষক আহ্বান জনায় মহন্ত দীপেন্দ্ৰ গিৰিয়ে । কিয়নো বাৰিষাকালত তেনে স্থানত থকা পথসমূহে ভক্তসকলৰ বাবে ভাবুকিৰ কঢ়িয়াব পাৰে । ইয়াৰ উপৰিও প্ৰশাসনক তীৰ্থযাত্ৰীসকলৰ বাবে উপযুক্ত বাসস্থান আৰু 'লংগৰ' স্থাপন কৰিবলৈ তেওঁ আহ্বান জনায় ।
ইফালে শেহতীয়া ডাৱৰ বিস্ফোৰণ সম্পৰ্কে তেওঁ সংবাদমাধ্যমৰ আগত কয় যে বতৰ বিজ্ঞান কেন্দ্ৰই স্পষ্ট কৰি দিছে যে যদি এঘণ্টাত ১০০ মিমি বৰষুণ হয় তেন্তে ইয়াক মেঘ বিস্ফোৰণ হিচাপে ধৰিব পাৰি । সেয়েহে, তেওঁ সন্দেহ প্ৰকাশ কৰি কয় যে ডাৱৰ বিস্ফোৰণৰ ফলত তীৰ্থযাত্ৰীসকলৰ মৃত্যু হোৱা নাছিল । অমৰনাথৰ গুহাৰ সমীপত প্ৰৱল বৃষ্টিপাতৰ ফলত সৃষ্টি হোৱা কৃত্ৰিম বানপানীয়ে একপ্ৰকাৰ অভাৱনীয় পৰিৱেশৰ সৃষ্টি কৰিছিল । ইয়াৰ ফলতে তীৰ্থযাত্ৰীসকলৰ মৃত্যু হৈছিল বুলি তেওঁ সন্দেহ কৰে ।
লগতে পঢ়ক :Dalai Lama left Dharamshala: এদিনীয়া ভ্ৰমণসূচীৰে জম্মুলৈ ৰাওনা তিব্বতীয় ধৰ্মগুৰু দালাই লামা
