নেশ্যনেল ডেস্ক,২৪ ডিচেম্বৰ :বাৰাণসীত আৰক্ষীয়ে গ্ৰেপ্তাৰ কৰিছে মেগছেছে বঁটা বিজয়ী ড০ সন্দীপ পাণ্ডেক (Sandeep Pandey arrested in Varanasi)। কৃষকৰ এক প্ৰতিবাদী কাৰ্যসূচীত অংশগ্ৰহণৰ বাবে আজমগড়লৈ গৈ থকা অৱস্থাতে ড০ সন্দীপ পাণ্ডেক আৰক্ষীয়ে গ্ৰেপ্তাৰ কৰে । ড০ সন্দীপ পাণ্ডেৰ লগতে তেওঁৰ সহযোগীসকলকো বাৰাণসীৰ কেণ্ট ৰে'ল ষ্টেচনত গ্ৰেপ্তাৰ কৰা হয় ।
জানিব পৰা মতে আৰক্ষীয়ে তেওঁক বাৰাণসী পুলিচ লাইনৰ অতিথিশালাত পৰ্যবেক্ষণত ৰাখিছে । আৰক্ষীয়ে জনোৱা মতে, আজমগড় কৃষক প্ৰতিবাদে অনুমতি পোৱা নাই । তাৰোপৰি উক্ত অঞ্চলত ১৪৪ ধাৰা জাৰি কৰা হৈছে । সেয়েহে প্ৰতিবাদত অংশগ্ৰহণৰ বাবে যোৱা বাবে ড০ পাণ্ডে আৰু তেওঁৰ সহযোগীসকলক বাৰাণসীত বাধা দিয়া হৈছে ।
উল্লেখ্য যে আজমগড়ত মাণ্ডুৰী বিমানবন্দৰৰ বিৰুদ্ধে কৃষকসকলৰ প্ৰতিবাদ অব্যাহত আছে (Farmer protest in Azamgarh)। আজমগড়ৰ কৃষকসকলে অভিযোগ কৰা মতে প্ৰস্তাৱিত বিমানবন্দৰৰ সম্প্ৰসাৰণৰ বাবে ৮ খন গাঁৱৰ হাজাৰ হাজাৰ বিঘা ভূমি অধিগ্ৰহণ কৰা হৈছে (Farmer land acquisition for Manduri airport)। ইয়াৰ ফলত কৃষকসকলে জীৱিকা হেৰুওৱাৰ আশংকা কৰিছে । কৃষকসকলে অভিযোগ কৰা মতে চৰকাৰে অধিগ্ৰহণৰ বাবে ৮০ শতাংশ কৃষকৰ সন্মতি লোৱাৰ ক্ষেত্ৰত আইন অনুসৰণ কৰা নাই ।