নিউজ ডেস্ক, ১৮ ডিচেম্বৰ : সোমবাৰে লোকসভাৰ পৰা ৩৩ গৰাকী বিৰোধী সদস্যক বহিষ্কাৰ কৰা হয় । ইয়াৰ ভিতৰত আছে সদনৰ কংগ্ৰেছ নেতা অধীৰ ৰঞ্জন চৌধুৰী, ডিএমকেৰ সাংসদ টি আৰ বালু আৰু দয়ানিধি মৰাণ আৰু তৃণমূলৰ সৌগত ৰয় । সদনৰ কাম-কাজত 'ব্যাঘাত' জনোৱাৰ অভিযোগত তেওঁলোকক বহিষ্কাৰ কৰা হয় ।
অৱশ্যে ৩৩ গৰাকীৰ ভিতৰত ৩০ গৰাকীক শীতকালীন অধিবেশনৰ বাকী সময়ছোৱাৰ বাবে বহিষ্কাৰ কৰাৰ বিপৰীতে তিনিগৰাকীক বিশেষাধিকাৰ সমিতিৰ প্ৰতিবেদনৰ বাবে বহিষ্কাৰ কৰা হয় । এই তিনিগৰাকী হৈছে কে জয়কুমাৰ, বিজয় বসন্ত আৰু আব্দুল খালেক । তেওঁলোক তিনিওজনে শ্লোগান দিবলৈ অধ্যক্ষৰ মঞ্চত উঠিছিল ।
উল্লেখ্য যে বিগত সপ্তাহত ১৩ গৰাকী বিৰোধী সাংসদক বহিষ্কাৰ কৰাৰ পিছত শেহতীয়াভাৱে সোমবাৰে এই বহিষ্কাৰ হয় । সেয়েহে ইয়াকে লৈ মুঠ ৪৬ গৰাকী সাংসদক বহিষ্কাৰ কৰা হৈছে । তেওঁলোকৰ ৪৩ জনক ১৩ ডিচেম্বৰৰ সংসদৰ নিৰাপত্তা উলংঘনৰ ওপৰত গৃহমন্ত্ৰীৰ বিবৃতি দাবী কৰাৰ বাবে বহিষ্কাৰ কৰা হৈছে ।
অধ্যক্ষই তেওঁলোকৰ নাম উচ্চাৰণ কৰাৰ পিছত সংসদীয় পৰিক্ৰমা মন্ত্ৰী প্ৰহ্লাদ যোশীয়ে বহিষ্কাৰ সন্দৰ্ভত এটা প্ৰস্তাৱ উত্থাপন কৰে আৰু ইয়াক ধ্বনি ভোটৰ দ্বাৰা গ্ৰহণ কৰা হয় । তাৰ পিছত দিনটোৰ বাবে সদন স্থগিত ৰখা হয় ।
আনহাতে, বহিষ্কাৰ সন্দৰ্ভত নিজৰ প্ৰতিক্ৰিয়া ব্যক্ত কৰি অধীৰ ৰঞ্জন চৌধুৰীয়ে কয়, "মোৰ লগতে আন নেতাসকলক বহিষ্কাৰ কৰা হৈছে । আমি পূৰ্বতে বহিষ্কাৰ কৰা আমাৰ সাংসদসকলক পুনৰ সদনলৈ ঘূৰাই আনিবলৈ আৰু গৃহমন্ত্ৰীয়ে সদনলৈ আহি বিবৃতি দিবলৈ কেইবাদিনো ধৰি দাবী কৰি আহিছোঁ । তেওঁ প্ৰতিদিনে টিভিত বিবৃতি দিয়ে । কিন্তু সংসদৰ নিৰাপত্তাৰ বাবে চৰকাৰে কি কৰি আছে সেই সন্দৰ্ভত তেওঁ সংসদতো অলপ কথা ক'ব পাৰে... বৰ্তমানৰ চৰকাৰে অত্যাচাৰৰ শিখৰত উপনীত হৈছে... বিজেপিয়ে সংসদক ইয়াৰ দলীয় কাৰ্যালয়লৈ পৰিৱৰ্তন কৰিব বিচাৰে । সেয়া কেতিয়াও হ'ব নোৱাৰে ।"
লগতে পঢ়ক :সংসদৰ নিৰাপত্তা উলংঘনৰ ষড়যন্ত্ৰ সোনকালেই স্পষ্ট হ'ব; কেন্দ্ৰীয় মন্ত্ৰী গিৰিৰাজ সিং
