নেশ্যনেল ডেস্ক, 15 জুলাই : বিহাৰৰ বিভিন্ন জিলাত বজ্ৰপাতৰ ফলত 24 জন লোকৰ মৃত্যু হৈছে । ইয়াৰ ভিতৰত ছাছাৰামত 5 জন আৰু আৰৱালত 4 জন লোকৰ মৃত্যু হৈছে । অৱশ্যে প্ৰশাসনে মাত্ৰ 9 জন লোকৰ মৃত্যু হোৱা বুলি নিশ্চিত কৰিছে । একে সময়তে মুখ্যমন্ত্ৰী নীতিশ কুমাৰে মৃতকৰ আত্মীয়লৈ 4 লাখ টকাৰ অনুদান দিবলৈ নিৰ্দেশ প্ৰদান কৰিছে । ইফালে বতৰ বিজ্ঞান বিভাগে শনিবাৰে বিহাৰৰ 26 খন জিলাত বৰষুণ আৰু বজ্ৰপাতৰ সতৰ্কবাণী জাৰি কৰিছে ।
বজ্ৰপাতৰ ফলত ক্ষতিগ্ৰস্ত হোৱা জিলাসমূহৰ ভিতৰত আছে পাটনা, ৰোহতাছ, আৰৱাল, মুজাফ্ফৰপুৰ, নালন্দা, ঔৰংগাবাদ আৰু বৈশালীকে ধৰি অন্যান্য জিলাসমূহ । য’ত ৰোহতাছত 5 জন, আৰৱালত 4 জন, ছাপৰাত 3 জন, ঔৰংগাবাদ আৰু পূৱ চম্পাৰণত 2 জন, কাইমুৰ, সীতামৰ্হী, মুজাফ্ফৰপুৰ, পাটনা, বৈশালী নালন্দা, আৰিয়া, কিষাণগঞ্জ, বাংকা আৰু ছিৱানত এজনকৈ লোকৰ মৃত্যু হৈছে । এইসকল লোকৰ মৃত্যুত গভীৰ শোক প্ৰকাশ কৰি ৰাজ্যখনৰ মুখ্যমন্ত্ৰী নীতিশ কুমাৰে বতাহ-বৰষুণৰ সময়ত অপ্ৰয়োজনীয়ভাৱে বাহিৰলৈ ওলাই নাযাবলৈ সকলোকে আহ্বান জনাইছে ।