নেশ্যনেল ডেস্ক,১৪ নৱেম্বৰ : আজি দেশৰ প্ৰথম প্ৰধানমন্ত্ৰী জৱাহৰলাল নেহৰুৰ জন্ম জয়ন্তী । দেশজুৰি নেহৰুৰ জন্মদিনটো শিশু দিৱস হিচাপে উদযাপন কৰা হৈছে । ইফালে প্ৰাক্তন প্ৰধানমন্ত্ৰীগৰাকীক আজি দেশজুৰি শ্ৰদ্ধাজ্ঞলি জনোৱা হৈছে । প্ৰধানমন্ত্ৰী নৰেন্দ্ৰ মোদীয়েও মঙলবাৰে প্ৰাক্তন প্ৰধানমন্ত্ৰী জৱাহৰলাল নেহৰুৰ জন্ম জয়ন্তীত শ্ৰদ্ধাঞ্জলি জ্ঞাপন কৰে । প্ৰধানমন্ত্ৰী মোদীয়ে এক্সৰ এটা পোষ্টত লিখিছে, "আমাৰ প্ৰথম প্ৰধানমন্ত্ৰী জৱাহৰলাল নেহৰুজীৰ জন্ম জয়ন্তীত তেওঁলৈ শ্ৰদ্ধাঞ্জলি ।"
ইফালে কংগ্ৰেছ নেতা ৰাহুল গান্ধীয়েও মঙলবাৰে প্ৰাক্তন প্ৰধানমন্ত্ৰীগৰাকীক শ্ৰদ্ধাঞ্জলি জ্ঞাপন কৰি কয় যে পণ্ডিত জৱাহৰলাল নেহৰু হৈছে স্বাধীনতা, প্ৰগতি আৰু ন্যায়ৰ চিন্তা । ৰাহুল গান্ধীয়ে এক্সৰ পোষ্টত লিখিছে যে ভাৰতক আজি 'জৱাহৰ হিন্দ'ৰ মূল্যবোধৰ প্ৰয়োজন ।
কংগ্ৰেছৰ সভাপতি মল্লিকাৰ্জুন খাৰ্গে, কংগ্ৰেছ সংসদীয় দলৰ অধ্যক্ষ ছোনিয়া গান্ধী আৰু অন্যান্য কংগ্ৰেছ নেতাসকলেও প্ৰাক্তন প্ৰধানমন্ত্ৰী জৱাহৰলাল নেহৰুৰ জন্ম জয়ন্তীত ৰাষ্ট্ৰীয় ৰাজধানীৰ শান্তিভানত পুষ্পাঞ্জলি জ্ঞাপন কৰে । খাৰ্গেয়ে সামাজিক মাধ্যমৰ এটা পোষ্টত লিখিছে যে পণ্ডিত জৱাহৰলাল নেহৰুৱে ভাৰতক শূন্যৰ পৰা শীৰ্ষলৈ লৈ গৈছিল । আধুনিক ভাৰতৰ স্ৰষ্টা, গণতন্ত্ৰৰ নিৰ্ভীক অভিভাৱক আৰু সকলোৰে অনুপ্ৰেৰণাৰ উৎস বুলিও তেওঁ নেহৰুক সম্বোধন কৰে ।