নেশ্যনেল ডেস্ক, ১৬ এপ্ৰিল: সমগ্ৰ দেশতে COVID-১৯ মহামাৰীয়ে পুনৰ কালৰূপ ধাৰণ কৰিছে । বিগত বৰ্ষত ভয়াৱহ সংকট সৃষ্টি কৰা মহামাৰীৰ সংক্ৰমণ যথেষ্ট নিয়ন্ত্ৰণলৈ আহিছিল যদিও এতিয়া পুনৰ বৃদ্ধি পাইছে সংক্ৰমণ । বৰ্তমান হৰিদ্বাৰত অনুষ্ঠিত হৈ থকা মহা কুম্ভ মেলাত অংশ লোৱা বহু ভক্ত, সাধু মহামাৰীৰ কবলত পৰিছে ।
শুক্ৰবাৰে হৰিদ্বাৰৰ মুখ্য চিকিৎসা বিষয়া ডাঃ এছ কে ঝাই সংবাদ মাধ্যমক জনোৱা মতে, চহৰখনত ৩০ গৰাকী সাধু COVID-১৯ত আক্ৰান্ত হৈছে । তেওঁ লগতে কয় যে, চিকিৎসা কৰ্মীৰ দলবোৰে সাধুসকলৰ আৰ টি-পিচি আৰ পৰীক্ষা কৰাই আছে । অহা ১৭ এপ্ৰিলৰ পৰা এই প্ৰক্ৰিয়া অধিক ত্বৰান্বিত কৰা হ'ব বুলিও তেওঁ জানিবলৈ দিয়ে । কুম্ভ মেলাত অংশ ল'বলৈ আহি মহামাৰীত আক্ৰান্ত হোৱা হৰিদ্বাৰৰ লোকসকলক হোম আইছ'লেছনত থকাৰ ব্যৱস্থা কৰা হৈছে ।
আনহাতে, চহৰখনৰ বাহিৰৰ পৰা মেলালৈ আহি মহামাৰীৰ কবলত পৰা লোকসকলক চিকিৎসালয়ত ভৰ্তি কৰোৱা হৈছে । ডাঃ ঝাই লগতে কয় যে, সংকটজনক অৱস্থাত থকা COVID-১৯ত আক্ৰান্ত ৰোগীসকলক ঋষিকেশস্থিত AIIMSলৈ প্ৰেৰণ কৰা হৈছে । তেওঁ লগতে স্পষ্ট কৰি দিয়ে যে, হৰিদ্বাৰৰ চিকিৎসালয়সমূহত এতিয়াও পৰিস্থিতি নিয়ন্ত্ৰিত অৱস্থাতে আছে ।