নেশ্যনেল ডেস্ক, ৩০ এপ্ৰিল: ক'ভিড-১৯ৰ প্ৰতিষেধক নিৰ্মাতাৰ পৰা প্ৰতিষেধকৰ ১ কোটি পালি ক্ৰয় কৰাৰ সিদ্ধান্ত গ্ৰহণ কৰিছে কেৰালা চৰকাৰে । শুকুৰবাৰে কেৰালাৰ মুখ্যমন্ত্ৰী পিনাৰায়ী বিজয়নে এই কথা জানিবলৈ দিয়ে । তেওঁ কয় যে, ছিৰাম ইনষ্টিটিউট অৱ ইণ্ডিয়াৰ পৰা ক'ভিশ্বিল্ডৰ ৭০ লাখ পালি ক্ৰয় কৰা হ'ব আৰু ভাৰত বায়'টেকৰ পৰা কেৰালা চৰকাৰে কোভাক্সিনৰ ৩০ লাখ পালি ক্ৰয় কৰিব ।
জি এছ টিসহ ক'ভিশ্বিল্ড প্ৰতিষেধক ক্ৰয়ৰ বাবদ চৰকাৰে ২৯৪ কোটি টকা ব্যয় কৰিব লাগিব । আনহাতে, কোভাক্সিন ক্ৰয়ৰ বাবদ ব্যয় হ'ব ১৮৯ কোটি টকা । মুখ্যমন্ত্ৰীগৰাকীয়ে কয় যে, ৰাজ্যখনৰ প্ৰয়োজনৰ প্ৰতি লক্ষ্য ৰাখি প্ৰতিষেধক ক্ৰয় কৰা হ'ব । ১৮ৰ পৰা ৪৫ বছৰ বয়সৰ লোকক প্ৰতিষেধক বিনামূলীয়াকৈ প্ৰদান কৰিব কেৰালা চৰকাৰে ।