নেশ্যনেল ডেস্ক, ২৪ ফেব্ৰুৱাৰী: 'টুলকিট' গোচৰৰ অভিযুক্ত 'পৰিৱেশবিদ' দিশা ৰবিয়ে জামিন লাভ কৰাৰ পিছতে প্ৰতিক্ৰিয়া প্ৰকাশ কৰিছে কংগ্ৰেছ নেতা কপিল ছিবালে । তেওঁ বুধবাৰে টুইটযোগে কয় যে, ন্যায়ালয়ে ৰাষ্ট্ৰদ্ৰোহৰ আইনৰ অপব্যৱহাৰ সন্দৰ্ভত প্ৰশ্ন কৰিবলৈ আৰম্ভ কৰিছে । উল্লেখ্য যে, মঙলবাৰে দিল্লীৰ সত্ৰ ন্যায়াধীশৰ আদালতে দিশা ৰবিৰ জামিন আবেদন মঞ্জুৰ কৰিছিল ।
কৃষকৰ প্ৰতিবাদ অব্যাহত থকা সময়ত ছ'চিয়েল মিডিয়াত 'টুলকিট' শ্বেয়াৰ কৰাৰ অভিযোগ উত্থাপিত হোৱাৰ পিছতে দিশাক যোৱা ১৩ ফেব্ৰুৱাৰীত বাংগালুৰুৰ পৰা দিল্লী আৰক্ষীৰ বিশেষ শাখাই গ্ৰেপ্তাৰ কৰিছিল । মঙলবাৰে সত্ৰ ন্যায়াধীশৰ আদালতে দিশাৰ জামিন মঞ্জুৰ কৰে । অৱশ্যে দিশাই নিশ্চিতি হিচাপে ১ লাখ টকাকৈ আদায় দিব লাগিব । সোমবাৰে একেখন আদালতে ২২ বছৰীয়া দিশাক এদিনৰ বাবে আৰক্ষীৰ জিম্মালৈ প্ৰেৰণ কৰিছিল । পূৰ্বে দিল্লীৰ আৰক্ষীৰ পক্ষত থাকি অধিবক্তা বিকাশে আদালতত জনাইছিল যে, এই গোচৰৰ সৈতে নিকিতা আৰু শান্তনু নামৰ দুগৰাকী লোকো জড়িত হৈ আছে ।