নেশ্যনেল ডেস্ক,২৬ মে' :জম্মু-কাশ্মীৰ অঞ্চলত সন্ত্ৰাসবাদীৰ বিৰুদ্ধে নিৰাপত্তা বাহিনীৰ অভিযান অব্যাহত আছে (Operation against militants in Jammu and Kashmir)। কিন্তু ইয়াৰ মাজতে বুদগাম জিলাৰ চাদুৰা অঞ্চলত চাঞ্চল্যকৰ ঘটনা সংঘটিত হৈছে । সন্ত্ৰাসবাদীৰ আক্ৰমণত নিহত হয় এগৰাকী মহিলা (Woman shot dead by militants in Budgam)। ঘটনাত এজন কিশোৰো আহত হোৱাৰ খবৰ পোৱা গৈছে ।
মৃত মহিলাগৰাকী এটা টেলিভিচনত কৰ্মৰত আমৰিন ভাট বুলি চিনাক্ত হৈছে । ইফালে এই আক্ৰমণত নিষিদ্ধ সন্ত্ৰাসবাদী সংগঠন লস্কৰ-ই-তৈবা (LeT)ৰ তিনি সদস্য জড়িত থকাৰ সন্দেহ কৰা হৈছে । ঘটনাৰ পাছতে তীব্ৰ উত্তেজনাই বিৰাজ কৰিছে সমগ্ৰ জিলাখনত । আৰক্ষী, নিৰাপত্তা বাহিনীয়ে সমগ্ৰ অঞ্চলতে কটকটীয়া নিৰাপত্তা বেষ্টনী গঢ়ি তুলিছে ।
জম্মু-কাশ্মীৰ আৰক্ষীয়ে জনোৱা মতে নিশা প্ৰায় ৭.৫৫ বজাত এই ঘটনাটো সংঘটিত হৈছে । খাজিৰ মহম্মদ নামৰ লোকজনৰ কন্যা আমৰিন ভাটৰ বাসগৃহত সন্ত্ৰাসবাদীয়ে আক্ৰমণ কৰে । আমৰিনৰ ঘৰত লক্ষ্য কৰি সন্ত্ৰাসবাদীয়ে গুলীবৰ্ষণ কৰে ফলত গুৰুতৰভাৱে আঘাতপ্ৰাপ্ত হয় মহিলাগৰাকী । লগে লগে তেওঁক চিকিৎসালয়লৈ প্ৰেৰণ কৰা হয় যদিও পৰৱৰ্তী সময়ত মহিলাগৰাকীৰ মৃত্যু হয় । আৰক্ষীয়ে জনোৱা মতে মহিলাগৰাকীৰ সৈতে থকা ১০ বছৰীয়া ভতিজাকৰ বাহুতো গুলী লাগে ।