নেশ্যনেল ডেস্ক, ৯ এপ্ৰিল: COVID-১৯ৰ সংক্ৰমণে ভয়াৱহ ৰূপ লোৱাৰ পূৰ্বেই সতৰ্কতা অৱলম্বন কৰি জম্মু-কাশ্মীৰৰ ৮ খন জিলাত জাৰি কৰা হৈছে নৈশ সান্ধ্য আইন । শুক্ৰবাৰে নিশাৰ পৰা জম্মু, শ্ৰীনগৰ, উধমপুৰ, বাৰামুল্লা, কথুৱা, অনন্তনাগ, বুদগাম আৰু কুপৱাৰাত সান্ধ্য আইন বলৱৎ হ'ব ।
এগৰাকী চৰকাৰী বিষয়াই জনোৱা মতে, চিকিৎসক, স্বাস্থ্যকৰ্মীৰ সকলো ছুটী বাতিল কৰা হৈছে । জম্মুৰ জি জি এম বিজ্ঞান মহাবিদ্যালয় আৰু সংস্কৃত বিশ্ববিদ্যালয়ৰ চাৰিওফালৰ অঞ্চলবোৰক মাইক্ৰ'-কণ্টেইনমেণ্ট জ'ন হিচাপে ঘোষণা কৰা হৈছে ।
লগতে প্ৰদৰ্শনী আৰু মেলা অনুষ্ঠিত কৰাৰ ক্ষেত্ৰতো নিষেধাজ্ঞা জাৰি কৰা হৈছে । বিষয়াজনে লগতে কয় যে, নৈশ সান্ধ্য আইন জম্মু, শ্ৰীনগৰ, উধমপুৰ, বাৰামুল্লা, কথুৱা, অনন্তনাগ, বুদগাম আৰু কুপৱাৰাৰ পৌৰ নিগমতে সীমাবদ্ধ থাকিব । শেহতীয়াকৈ, জম্মু-কাশ্মীৰত COVID-১৯ৰ ঘটনা উদ্বেগজনকভাৱে বৃদ্ধি পাইছে ।
বৃহস্পতিবাৰে ৮৩৫ গৰাকী লোক নতুনকৈ মহামাৰীত আক্ৰান্ত হৈছে । বৰ্তমান জম্মু-কাশ্মীৰত সক্ৰিয় আক্ৰান্তৰ ঘটনাৰ সংখ্যা ৫,৬২৩ জনলৈ বৃদ্ধি পাইছে ।
লগতে পঢ়ক:উৎকোচ লৈ থকা সময়তে হাতে-লোটে কৰায়ত্ত স্বাস্থ্য বিষয়া
