নিউজ ডেস্ক, ১৯ ছেপ্টেম্বৰ : ভাৰতীয় মহাকাশ গৱেষণা সংস্থাই (ইছৰো) মঙলবাৰে ঘোষণা কৰিছে যে ইয়াৰ প্ৰথম সৌৰ অভিযান আদিত্য-এল১-য়ে সফলতাৰে ট্ৰেন্স-লাগ্ৰেঞ্জিয়ান পইণ্ট ১ ইনচাৰ্চন (TL1I) কৌশল প্ৰদৰ্শন কৰিছে আৰু মহাকাশযানখন এতিয়া সূৰ্য-পৃথিৱী এল১ বিন্দুলৈ লৈ যোৱা এক গতি পথত আছে ।
ইছৰোৱে লগতে এইটোও জনাইছে যে একেৰাহে পঞ্চমবাৰৰ বাবে ইছৰোৱে কোনো এটা অবজেক্ট সফলতাৰে আন এটা মহাকাশীয় অবজেক্ট বা মহাকাশৰ অৱস্থানৰ ফালে স্থানান্তৰ কৰিছে ।
ছ'চিয়েল মিডিয়া প্লেটফৰ্ম ইছৰোৰ অফিচিয়েল এক্স হেণ্ডেলত এটা পোষ্টত লিখিছে, "আদিত্য-এল১ মিছন । অফ টু ছান-আৰ্থ এল১ পইণ্ট । ট্ৰেন্স-লাগ্ৰেঞ্জিয়ান পইণ্ট ১ ইনচাৰ্চন (TL1I) কৌশল সফলতাৰে সম্পাদন কৰা হয় । মহাকাশযানখন এতিয়া এক পথত আছে, যিয়ে ইয়াক সূৰ্য-পৃথিৱী এল১ বিন্দুলৈ লৈ যাব । প্ৰায় ১১০ দিনৰ পিছত কক্ষপথ সলনিৰ জৰিয়তে ইয়াক এল১ৰ চাৰিওফালে এটা কক্ষপথত সুমুৱাই দিয়া হ'ব । এইটো একেৰাহে পঞ্চমবাৰৰ বাবে ইছৰোৱে সফলতাৰে সম্পাদন কৰিছে ।"
উল্লেখ্য, আদিত্য-এল১ হৈছে প্ৰথম ভাৰতীয় মহাকাশ-ভিত্তিক অবজাৰভেটৰী, যিয়ে পৃথিৱীৰ পৰা প্ৰায় ১.৫ নিযুত কিলোমিটাৰ দূৰত্বত অৱস্থিত প্ৰথম সূৰ্য-পৃথিৱী লাগ্ৰাঞ্জিয়ান বিন্দুৰ (এল১) চাৰিওফালে থকা হেলো কক্ষপথৰ পৰা সূৰ্য অধ্যয়ন কৰিব । যিটো দূৰত্ব হৈছে পৃথিৱী-সূৰ্য দূৰত্বৰ প্ৰায় এক শতাংশ ।
সূৰ্য হৈছে গেছৰ এক বিশাল গোলক আৰু আদিত্য-এল১-এ সূৰ্যৰ বাহিৰৰ বায়ুমণ্ডল অধ্যয়ন কৰিব । ই সূৰ্যৰ ওপৰত অৱতৰণ নকৰে বা সূৰ্যৰ ওচৰলৈ নাযায় ।
উৎক্ষেপণৰ পিছৰে পৰা আদিত্য-এল১-এ পৃথিৱীৰ চাৰিওফালে যাত্ৰা কৰাৰ সময়ত ক্ৰমান্বয়ে ৩, ৫,১০ আৰু ১৫ ছেপ্টেম্বৰত চাৰিটা পৃথিৱী-আবদ্ধ কক্ষপথ সলনি কৰিছে । ইয়াৰ দ্বাৰা ই এল১-লৈ ইয়াৰ পৰৱৰ্তী যাত্ৰাৰ বাবে প্ৰয়োজনীয় বেগ লাভ কৰিছে ।