নেশ্যনেল ডেস্ক,১৪ আগষ্ট : দেশৰ ৭৭ সংখ্যক স্বাধীনতা দিৱস উদযাপনৰ বাবে দেশবাসী সাজু হৈছে । তাৰ প্ৰাকক্ষণত সীমান্ত অঞ্চলত নিৰাপত্তা বাহিনীয়ে অনুপ্ৰৱেশকাৰীৰ বিৰুদ্ধে অভিযান অব্যাহত ৰাখিছে । পঞ্জাৱৰ পাঠানকোট জিলাত পুনৰ নিৰাপত্তা বাহিনীৰ গুলীত নিহত পাকিস্তানৰ অনুপ্ৰৱেশকাৰী । পাকিস্তানী অনুপ্ৰৱেশকাৰীজনে পাঠানকোটৰ আন্তঃৰাষ্ট্ৰীয় সীমান্ত পাৰ হ'বলৈ চেষ্টা কৰাৰ সময়তে নিৰাপত্তা বাহিনীয়ে গুলীচালনা কৰে ।
জানিব পৰা মতে, ঘটনাটো সোমবাৰে পুৱতি নিশা সংঘটিত হয় । এগৰাকী বিএছএফ বিষয়াই জনোৱা মতে সীমান্ত সুৰক্ষা বাহিনীৰ (বিএছএফ) জোৱানে পাঠানকোটৰ চিম্বল চাকোল গাঁৱৰ ওচৰত নিশা প্ৰায় ১২:৩০ মান বজাত সন্দেহজনক গতিবিধি লক্ষ্য কৰে ।
প্ৰথমে ঘটনাস্থলীত কৰ্তব্যৰত বিএছএফ জোৱানসকলে অনুপ্ৰৱেশকাৰীজনক প্ৰত্যাহ্বান জনাইছিল কিন্তু অনুপ্ৰৱেশকাৰীজনে বিএছএফৰ প্ৰতি কোনো গুৰুত্ব নিদিলে । অনুপ্ৰৱেশকাৰীজনক বাৰে বাৰে সতৰ্কবাণী দিয়াৰ পাছতো তেওঁ উপেক্ষা কৰে আৰু সীমান্তৰ ফালে আগবাঢ়ি যায় । যাৰ বাবে জোৱানসকল সতৰ্ক হৈ পৰে । সম্ভাব্য ভাবুকি অনুভৱ কৰি জোৱানসকলে গুলীচালনা কৰিবলৈ বাধ্য হয় । ফলস্বৰূপে ঘটনাস্থলীতে অনুপ্ৰৱেশকাৰীজন নিহত হয় ।