নিউজ ডেস্ক, 5 ছেপ্টেম্বৰ: 5 অক্টোবৰৰ পৰা আৰম্ভ হ’ব আই চি চি এদিনীয়া বিশ্ব কাপ 2023 ৷ ভাৰতত হ’ব লগা মেগা ইভিন্টেলৈ সাজু হৈছে 10 খন দেশৰ 10 টা দল ৷ 5 অক্টোবৰৰ পৰা আৰম্ভ হ’ব লগা বিশ্ব কাপক লৈ আজি ভাৰতীয় দলৰ নাম ঘোষণা কৰে ভাৰতীয় ক্ৰিকেট কণ্ট্ৰোল বোৰ্ড চমুকৈ বিচিচিআইয়ে ৷ শ্ৰীলংকাত এক সংবাদমেল যোগে মুখ্য নিৰ্বাচক অজিত আগৰকাৰে আগন্তুক এদিনীয়া বিশ্বকাপ 2023ৰ বাবে 15 জনীয়া ভাৰতীয় দলৰ নাম ঘোষণা কৰিছে ৷ 15 জনীয়া দলটোত আছে অধিনায়ক ৰোহিত শৰ্মা, শুভমন গিল, বিৰাট কোহলী, শ্ৰেয়স আয়াৰ, ঈশান কিষাণ, কে এল ৰাহুল, হাৰ্দিক পাণ্ডিয়া (উপ-অধিনায়ক), সূৰ্যকুমাৰ যাদৱ, ৰবীন্দ্ৰ জাদেজা, অক্সৰ পেটেল, শাৰ্দুল ঠাকুৰ, যশপ্ৰীত বুমৰাহ, মহম্মদ ছামী, মহম্মদ চিৰাজ, কুলদীপ যাদৱ ৷
আনহাতে উইকেটকিপাৰ বেটছমেন কে এল ৰাহুলে 15 জনীয়া দলত স্থান পাব নে নাই সেয়া নিশ্চিত নাছিল ৷ কাৰণ আঘাতৰ বাবে কেইবাখনো চিৰিজত খেলিব পৰা নাছিল ৷ সেয়ে বাংগালুৰুস্থিত ৰাষ্ট্ৰীয় ক্ৰিকেট একাডেমীত স্বাস্থ্য পৰীক্ষাৰ পিচত ফিট ঘোষণা কৰা উইকেটকিপাৰ বেটছমেন কে এল ৰাহুলে 15 জনীয়া দলত স্থান লাভ কৰিছে । তদুপৰিও এছিয়া কাপৰ প্ৰদৰ্শনৰ ওপৰত ভিত্তি কৰি দলৰ অন্যান্য খেলুৱৈক নিৰ্বাচন কৰা বুলি প্ৰকাশ পাইছে ৷