নিউজ ডেস্ক, ২৪ জুন : আগন্তুক ৫ দিনত উত্তৰ-পূৰ্বাঞ্চল আৰু ইয়াৰ কাষৰীয়া পূব ভাৰতত পাতলীয়াৰ পৰা মজলীয়া বৰষুণৰ লগতে বিজুলী-ঢেৰেকনি হোৱাৰ সম্ভাৱনা আছে । বতৰ বিজ্ঞান বিভাগে ২৬ জুনলৈকে অৰুণাচল প্ৰদেশ আৰু বিহাৰত ধাৰাসাৰ বৰষুণৰ ভৱিষ্যদ্বাণী কৰিছে । আনহাতে, ২৬ জুনত অসম আৰু মেঘালয়ত, নাগালেণ্ড, মণিপুৰ আৰু মিজোৰামত ২৭ জুনলৈকে বৰষুণ হোৱাৰ সম্ভাৱনা আছে । লগতে পশ্চিমবংগ আৰু ছিকিমতো বৰষুণৰ সম্ভাৱনাৰ কথা জনোৱা হৈছে । আনহাতে, ২৭ জুনত ওড়িশাত আৰু ২৫ আৰু ২৬ জুনত ঝাৰখণ্ডত বৰষুণৰ সম্ভাৱনাও ব্যক্ত কৰা হৈছে ।
ভাৰতীয় বতৰ বিজ্ঞান বিভাগৰ পূৰ্বানুমান অনুসৰি, দক্ষিণ-পশ্চিম মৌচুমী বায়ু আগবাঢ়ি যোৱাৰ বাবে ছত্তীশগড়, ঝাৰখণ্ড আৰু বিহাৰৰ বাকী অংশ, পূব মধ্যপ্ৰদেশৰ পৰিস্থিতি অনুকূল হৈ থাকিব । পৰৱৰ্তী দুদিনত উত্তৰ প্ৰদেশ আৰু উত্তৰাখণ্ডৰ কিছু অংশত মৌচুমী বৰষুণ হোৱাৰ সম্ভাৱনা আছে । বতৰ বিজ্ঞান কেন্দ্ৰৰ পূৰ্বানুমান অনুসৰি, আগন্তুক ৩-৪ দিনৰ ভিতৰত মহাৰাষ্ট্ৰ, কৰ্ণাটক আৰু তেলেংগানাৰ কিছু অংশত দক্ষিণ-পশ্চিম মৌচুমী বায়ু অধিক আগুৱাই যোৱাৰ বাবে পৰিস্থিতি অনুকূল হৈ পৰিব ।
পূৰ্বানুমান অনুসৰি, পূব-মধ্য আৰু উত্তৰ-পশ্চিম ভাৰতৰ কিছু অংশত আগন্তুক পাঁচ দিনত ধাৰাসাৰৰ পৰা পিৰবল বৰষুণ হোৱাৰ সম্ভাৱনা আছে । বতৰ বিজ্ঞান বিভাগৰ মতে, শুকুৰবাৰে দক্ষিণ-পশ্চিম মৌচুমী বায়ু কৰ্ণাটক, তেলেংগানাৰ বাকী অংশলৈ আগবাঢ়িছে । শুকুৰবাৰে অন্ধ্ৰপ্ৰদেশ, বিদৰ্ভ, ছত্তীশগড়ৰ কিছু অংশ, উত্তৰ-পশ্চিম বংগোপসাগৰৰ বাকী অংশ, ওড়িশা আৰু গাঙ্গেয় পশ্চিমবংগৰ বাকী অংশ, ঝাৰখণ্ড আৰু বিহাৰৰ কিছু অংশ আৰু পূব উত্তৰ প্ৰদেশৰ কিছু অংশত বাৰিষাৰ বৰষুণ হোৱা দেখা যায় ।
পৰৱৰ্তী ৫ দিনত বতৰ বিজ্ঞানৰ গুৰুত্বপূৰ্ণ পূৰ্বানুমান আৰু সতৰ্কবাণী
দক্ষিণ-পশ্চিম মৌচুমী বায়ু শক্তিশালী হোৱাৰ বাবে বতৰ বিভাগে দেশৰ বাকী অংশৰ বাবে বতৰৰ পূৰ্বানুমান আৰু সতৰ্কবাণী জাৰি কৰিছে । বতৰ বিজ্ঞান বিভাগৰ মতে, উত্তৰ-পশ্চিম বংগোপসাগৰৰ ওপৰেৰে কেন্দ্ৰীয় ট্ৰোপোস্ফেৰিক স্তৰলৈকে এক ঘূৰ্ণীবতাহ বিস্তীৰ্ণ হৈ আছে ।