নিউজ ডেস্ক, 17 অক্টোবৰ: মঙলবাৰে প্ৰধানমন্ত্ৰী নৰেন্দ্ৰ মোদীৰ অধ্যক্ষতাত ভাৰতৰ গগণযান অভিযানৰ অগ্ৰগতিৰ মূল্যায়ন আৰু ভাৰতৰ মহাকাশ অন্বেষণ প্ৰচেষ্টাৰ ভৱিষ্যতৰ ৰূপৰেখা দাঙি ধৰাৰ বাবে এখন উচ্চ পৰ্যায়ৰ বৈঠক অনুষ্ঠিত হয় । উক্ত বৈঠকত মহাকাশ বিভাগে গগণযান অভিযানৰ এক বিস্তৃত আভাস দাঙি ধৰে, য’ত এতিয়ালৈকে বিকশিত হোৱা বিভিন্ন প্ৰযুক্তি যেনে হিউমেন ৰেটেড উৎক্ষেপণ বাহন আৰু ব্যৱস্থাৰ অৰ্হতা আদি অন্তৰ্ভুক্ত কৰা হয় ।
মন কৰিবলগীয়া যে হিউমেন ৰেটেড উৎক্ষেপণ বাহন (HLVM3)ৰ ৩ টা অক্ৰুড মিছনকে ধৰি প্ৰায় ২০ টা ডাঙৰ পৰীক্ষণৰ পৰিকল্পনা কৰা হৈছে । ক্ৰু এস্কেপ চিষ্টেম টেষ্ট বাহনৰ প্ৰথমটো প্ৰদৰ্শনীমূলক উৰণ ২১ অক্টোবৰত অনুষ্ঠিত হ’ব । বৈঠকত ২০২৫ চনত আৰম্ভ হ’ব লগীয়া মিছনৰ প্ৰস্তুতিৰ মূল্যায়ন কৰা হয় ।
শেহতীয়া চন্দ্ৰযান-৩ আৰু আদিত্য এল ১ মিছনকে ধৰি ভাৰতীয় মহাকাশ অনুসন্ধানৰ পদক্ষেপৰ সফলতাৰ ওপৰত ভিত্তি কৰি প্ৰধানমন্ত্ৰীয়ে নিৰ্দেশ দিয়ে যে ভাৰতে এতিয়া ২০৩৫ চনৰ ভিতৰত ‘ভাৰতীয় অন্তৰীক্ষ ষ্টেচন’ (ভাৰতীয় মহাকাশ কেন্দ্ৰ) স্থাপনকে ধৰি নতুন আৰু অভিলাষী প্ৰকল্পৰ লক্ষ্য লোৱা উচিত আৰু ২০৪০ চনৰ ভিতৰত প্ৰথমজন ভাৰতীয়ক চন্দ্ৰলৈ প্ৰেৰণৰ বাবেও পদক্ষেপ গ্ৰহণ কৰিব লাগে ।