নেশ্যনেল ডেস্ক, ৩০ ছেপ্টেম্বৰ: ভাৰতত এতিয়াও অব্যাহত আছে ক'ভিড-১৯(COVID-19) ৰ সংক্ৰমণৰ ভয়াৱহতা । টীকাকৰণ অভিযান অব্যাহত থকাৰ মাজতে দৈনিক ২০ হাজাৰৰো অধিক লোক মহামাৰীৰ কবলত পৰিছে । বৃহস্পতিবাৰে পুৱা ৮ বজাত কেন্দ্ৰীয় স্বাস্থ্য মন্ত্ৰালয়ে(Union Health Ministry) প্ৰকাশ কৰা তথ্য অনুসৰি, যোৱা ২৪ ঘণ্টাত ভাৰতত নতুনকৈ ২৩,৫২৯ জন মহামাৰীৰ কবলত পৰিছে । বুধবাৰৰ দিনটোত ৩১১ জন লোকৰ মৃত্যু হৈছে ।
আনহাতে, দেশত বৰ্তমান মুঠ সক্ৰিয় আক্ৰান্তৰ ঘটনা হৈছে ২,৭৭,০২০ টা । এতিয়ালৈকে ৪,৪৮,০৬২ জনে প্ৰাণ হেৰুওৱাৰ বিপৰীতে বৰ্তমানলৈকে ৩,৩০,১৪,৮৯৮ জন লোক আৰোগ্য হৈ উঠিছে । কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি, যোৱা ২৪ ঘণ্টাত প্ৰায় ২৮,৭১৮ জন লোক আৰোগ্য হৈ উঠিছে ।