নেশ্যনেল ডেস্ক,২০ জুন :চীনৰ আন এক কু-অভিসন্ধি পোহৰলৈ আহিছে । ম্যানমাৰৰ কোকো দ্বীপত চীনা সেনাই নিৰীক্ষণ শিবিৰ স্থাপন কৰিছে । ম্যানমাৰে চীনক বংগোপসাগৰৰ কোকো দ্বীপপুঞ্জত নিৰীক্ষণৰ সুবিধা স্থাপনৰ অনুমতি দিছে । যাক লৈ ক্ষুব্ধ হৈ পৰিছে ভাৰত । সন্দেহ কৰা মতে কোকো দ্বীপপুঞ্জৰ পৰা চীনে ওড়িশাৰ বালাছোৰ পৰীক্ষা কেন্দ্ৰৰ পৰা ভাৰতৰ মিছাইল উৎক্ষেপণৰ লগতে বিশাখাপট্টনম চহৰৰ দক্ষিণে পূব সাগৰৰ পাৰত অৱস্থিত কৌশলগত সম্পদৰ ওপৰত লক্ষ্য ৰাখিছে ।
ভাৰতে ম্যানমাৰৰ সেনা প্ৰধান জেনেৰেল মিন অং হ্লাইঙৰ নেতৃত্বৰ ম্যানমাৰৰ বৰ্তমানৰ ৰাজনৈতিক কৰ্তৃপক্ষৰ সৈতে সম্পৰ্ক স্থাপন কৰাৰ লগতে চাউথ ব্লকে কোকো দ্বীপপুঞ্জৰ বিষয়টো উত্থাপন কৰিছে কিন্তু এই ক্ষেত্ৰত নেপিড'ৰ পৰা পোৱা উত্তৰত সন্তুষ্ট হোৱা নাই । অৱশ্যে কোকো দ্বীপপুঞ্জত ৰানৱে, আশ্ৰয় শিবিৰ, নিৰীক্ষণ কেন্দ্ৰ স্থাপন বা আন্তঃগাঁথনি উন্নয়নত চীনাসকলৰ ভূমিকা থকা কথাটো অস্বীকাৰ কৰিছে ম্যানমাৰ জুণ্টা সেনাই ।
ম্যানমাৰ জুণ্টা সেনাই অস্বীকাৰ কৰিলেও বেইজিঙৰ সৈতে থকা সম্পৰ্ক নুই কৰিব নোৱাৰি । চীনে ম্যানমাৰক প্ৰায় ৪ বিলিয়ন আমেৰিকান ডলাৰ সাহায্য আগবঢ়াইছে আৰু বংগোপসাগৰ আৰু ভাৰত মহাসাগৰত আধিপত্য বিস্তাৰ কৰিবলৈ চীন-ম্যানমাৰ-বাংলাদেশ কৰিডৰ গঠনৰ বাবে বাংলাদেশৰ সৈতে বেল্ট ৰোড ইনিশিয়েটিভত নেপিড'ক লগ কৰিবলৈ চেষ্টা কৰি আছে ।