Uttarkashi Tunnel Accident : উত্তৰকাশী সুৰংগ দুৰ্ঘটনাৰ উদ্ধাৰকাৰ্য; অগাৰ মেচিনেৰে আবদ্ধ শ্ৰমিকক উদ্ধাৰৰ চেষ্টা

উত্তৰকাশীৰ চিল্কিয়াৰা সুৰংগত আবদ্ধ ৪০ জন শ্ৰমিকক উদ্ধাৰৰ কাম যুদ্ধগতিত চলি আছে । কিন্তু প্ৰাকৃতিক বাধাৰ বাবে উদ্ধাৰকাৰ্যৰ ড্ৰিলিঙৰ গতি লেহেমীয়া হোৱা বাবে দ্বিতীয় পৰিকল্পনাৰ কামো চলি আছে । ইতিমধ্যে কেন্দ্ৰীয় সংস্থাবোৰে বায়ু সেনাৰ সহায়ত গধুৰ অগাৰ ড্ৰিলিং মেচিন আনি উদ্ধাৰকাৰ্যত ব্যৱহাৰৰ কাম আৰম্ভ কৰিছে । এই যন্ত্ৰই উদ্ধাৰ অভিযান খৰতকীয়া বৃদ্ধি কৰিব ।

নিউজ ডেস্ক, ১৫ নৱেম্বৰ : উত্তৰকাশীৰ চিল্কিয়াৰাৰ চাৰধাম ৰোড প্ৰকল্পৰ সুৰংগত আবদ্ধ হৈ থকা শ্ৰমিকসকলক উদ্ধাৰৰ বাবে প্ৰচেষ্টা অব্যাহত আছে । কিন্তু নতুনকৈ ধ্বংসস্তূপ পৰাৰ বাবে ড্ৰিলিঙৰ গতি লেহেমীয়া হৈছে । যাৰ বাবে এতিয়া কেন্দ্ৰীয় সংস্থাসমূহে বায়ু সেনাৰ সহায়ত গধুৰ অগাৰ ড্ৰিলিং মেচিন আনিছে । ইয়াৰ দ্বাৰা সাহায্য আৰু উদ্ধাৰ অভিযান খৰতকীয়া কৰিব পৰা যাব । ডিজিপি অশোক কুমাৰে জনোৱা অনুসৰি, ইয়াৰ দ্বাৰা সোনকালেই সকলো শ্ৰমিকক সুৰক্ষিতভাৱে উদ্ধাৰ কৰিব পৰা যাব ।

উল্লেখ্য যে দেওবাৰে পুৱা উত্তৰকাশীৰ এই সুৰংগটোত ভূমিস্খলনৰ ফলত তাৰ ভিতৰত আবদ্ধ হৈ পৰে ৪০ জনকৈ শ্ৰমিক । চিল্কিয়াৰা সুৰংগত ভূমিস্খলনৰ ফলত আবদ্ধ হৈ থকা শ্ৰমিকসকলক উদ্ধাৰ কৰিবলৈ বিগত তিনি দিন ধৰি ব্যাপক প্ৰচেষ্টা চলাই থকা হৈছে । কিন্তু বিভিন্ন প্ৰাকৃতিক কাৰণত সেয়া এতিয়ালৈকে সম্ভৱ হোৱা নাই ।

যাৰ বাবে এতিয়া সুৰংগত আবদ্ধ হৈ থকা শ্ৰমিকসকলক বচাবলৈ গধুৰ আগৰ যন্ত্ৰৰ ওপৰতে অন্তিম ভৰসা কৰা হৈছে । পাইপ ঠেলা প্ৰযুক্তিৰ এই যন্ত্ৰটোৱে সুৰংগটোৰ ধ্বংসাৱশেষৰ মাজত ড্ৰিল কৰিব আৰু ভিতৰলৈ ৮৮০-৯০০ মিঃমিঃ পাইপ প্ৰেৰণ কৰিব । ই এটা পথৰ সৃষ্টি কৰিব । সুৰংগটোৰ ভিতৰত আবদ্ধ লোকসকল উক্ত পথৰ জৰিয়তেই ওলাই আহিব পাৰিব ।

জানিব পৰা মতে, সোমবাৰে দুৰ্ঘটনাস্থলীত অগাৰ মেচিনেৰে ড্ৰিলিং কৰাৰ সিদ্ধান্ত লোৱা হৈছিল । এই যন্ত্ৰটো মঙলবাৰে পুৱা ৬ বজাত উক্ত স্থানত উপস্থিত হয় । ইয়াৰ বাবে প্লেটফৰ্ম নিৰ্মাণ কৰাৰ কাম এদিন পূৰ্বেই কৰা হৈছিল । আনহাতে, যন্ত্ৰটো সন্ধিয়া স্থাপন কৰা হয় । এই যন্ত্ৰটো আন্তঃগাঁথনিৰ তলত পাইপলাইন স্থাপন কৰিবলৈ ব্যৱহাৰ কৰা হয় ।

এই যন্ত্ৰটোৱে সুৰংগৰ ভিতৰত আবদ্ধ শ্ৰমিকসকলক উলিয়াই আনিবলৈ ড্ৰিলিং কৰি আছে । চিঅ' প্ৰশান্ত কুমাৰে জনোৱা মতে, অগাৰ যন্ত্ৰটো স্থাপন কৰা হৈছে । ইয়াৰ দ্বাৰা নৰম ষ্টীলৰ পাইপ ধ্বংসাৱশেষলৈ ঠেলি পথটো প্ৰস্তুত কৰা হৈছে, যাৰ দ্বাৰা শ্ৰমিকসকল বাহিৰলৈ ওলাই আহিব ।

লগতে পঢ়ক :Tragic death of four workers: গুজৰাটী নৱবৰ্ষৰ দিনাই শ্বাসৰুদ্ধ হৈ মৃত্যু 4 শ্ৰমিকৰ