নিউজ ডেস্ক, ১৩ ছেপ্টেম্বৰ:১৮ ছেপ্টেম্বৰৰ পৰা ২২ ছেপ্টেম্বৰলৈ সংসদৰ বিশেষ অধিৱেশন অনুষ্ঠিত হ’ব । সংসদৰ সুচাৰুৰূপে কাম-কাজ সুনিশ্চিত কৰিবলৈ শাসকীয় দলে এদিন পূৰ্বে অৰ্থাৎ ১৭ ছেপ্টেম্বৰত এখন সৰ্বদলীয় বৈঠকৰ আহ্বান কৰিছে । সংসদৰ এই অধিৱেশনৰ কাৰ্যসূচী কি হ’ব সেয়া এতিয়াও ৰাজহুৱা কৰা হোৱা নাই ।
সংসদীয় পৰিক্ৰমা মন্ত্ৰী প্ৰহ্লাদ যোশীয়ে কয় যে ১৭ ছেপ্টেম্বৰৰ সন্ধিয়া ৪.৩০ বজাত সৰ্বদলীয় বৈঠকৰ আয়োজন কৰা হৈছে । ই-মেইলৰ জৰিয়তে সকলো নেতালৈ তথ্য প্ৰেৰণ কৰা হৈছে বুলিও তেওঁ কয় । সংসদৰ বিশেষ অধিৱেশন সন্দৰ্ভতো প্ৰতিৰক্ষা মন্ত্ৰী ৰাজনাথ সিঙৰ ঘৰত এখন বৈঠক অনুষ্ঠিত হোৱাৰ খবৰ পোৱা গৈছে ।
এই বৈঠকত সংসদৰ অধিবেশনত অন্তৰ্ভুক্ত কাৰ্যসূচীসমূহ বিবেচনা কৰাৰ সম্ভাৱনা আছে । অৱশ্যে আনুষ্ঠানিকভাৱে এজেণ্ডাৰ বিষয়ে কোনেও নিশ্চিত কৰা নাই । গৃহমন্ত্ৰী অমিত শ্বাহ, ৰে’লমন্ত্ৰী অশ্বিনী বৈষ্ণৱ আৰু কেন্দ্ৰীয় মন্ত্ৰী অনুৰাগ ঠাকুৰেও এই বৈঠকত অংশগ্ৰহণ কৰিব ।
এতিয়ালৈকে পোৱা তথ্য অনুসৰি পুৰণি সংসদ ভৱনত বিশেষ অধিৱেশন আৰম্ভ হ’ব যদিও পিছদিনাখনৰ পৰা নতুন সংসদ ভৱনত বৈঠক অনুষ্ঠিত হ’ব । চলিত বৰ্ষৰ ২৮ মে’ত সংসদৰ নতুন ভৱন উদ্বোধন কৰা হৈছিল ।