নিউজ ডেস্ক, ১৭ ডিচেম্বৰ: অৰুণাচল প্ৰদেশৰ এগৰাকী প্ৰাক্তন বিধায়কক শনিবাৰে সন্দেহযুক্ত উগ্ৰপন্থীয়ে গুলীয়াই হত্যা কৰে । ম্যানমাৰ সীমান্তৰ সমীপৱৰ্তী টিৰাপ জিলাৰ ৰাহো গাঁৱৰ সমীপত বিয়লি প্ৰায় ৩ বজাত সংঘটিত হয় এই ঘটনা । টিৰাপ আৰক্ষী অধীক্ষক ৰাহুল গুপ্তাই জনোৱা মতে, কংগ্ৰেছৰ প্ৰাক্তন বিধায়ক য়ামচেন মেটে তেওঁৰ তিনিজন সমৰ্থকৰ সৈতে কোনো ব্যক্তিগত কামৰ বাবে গাঁওখনলৈ গৈছিল ৷ সেই সময়তে কোনোবাই কোনো অজুহাতত তেওঁলোকক হাবিলৈ লৈ গৈছিল আৰু তেওঁলোকৰ ওপৰত গুলীচালনা কৰে । এই আক্ৰমণত ঘটনাস্থলীতে মৃত্যু হয় প্ৰাক্তন বিধায়কগৰাকীৰ ৷
ইফালে এই ঘটনাৰ সম্ভেদ লাভ কৰাৰ পিচতে আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰিছে ৷ প্ৰতিৰক্ষা বিভাগৰ এই সূত্ৰই প্ৰাক্তন বিধায়কগৰাকীৰ হত্যাকাণ্ডত এন এছ চি এন-কে ৱাই এ জড়িত থকাৰ সম্ভাৱনা ব্যক্ত কৰিছে । আনহাতে আৰক্ষী অধীক্ষকগৰাকীয়ে এই সন্দৰ্ভত কোনো মন্তব্য কৰাৰ পৰা বিৰত থাকে ।
য়ামচেন মেটে ২০০৯ চনত কংগ্ৰেছৰ টিকটত খোংছা পশ্চিম বিধানসভা সমষ্টিৰ পৰা বিধায়ক নিৰ্বাচিত হৈছিল । ২০১৯ চনত খোংছা পশ্চিম বিধানসভা সমষ্টিৰ নেশ্যনেল পিপলছ পাৰ্টিৰ বিধায়ক টিৰং আবোকে ধৰি আন ১০ জন লোকক সন্দেহযুক্ত উগ্ৰপন্থীয়ে হত্যা কৰিছিল । য়ামচেন মেটে ২০১৫ চনত বিজেপিত যোগদান কৰে আৰু চলিত বৰ্ষৰ আৰম্ভণিতে ২০২৪ চনত বিধানসভা নিৰ্বাচনত অৱতীৰ্ণ হোৱাৰ ইচ্ছা প্ৰকাশ কৰিছিল । তেওঁ ৰাজনীতিত প্ৰৱেশ কৰাৰ পূৰ্বে চাংলাং জিলাত জিলাৰ শিক্ষা বিষয়া হিচাপে কাৰ্যনিৰ্বাহ কৰিছিল ।