জিকিব কোন ? পাঁচ ৰাজ্যৰ নিৰ্বাচনী সমীক্ষাই কি কয় ?

পাঁচ ৰাজ্যৰ বিধানসভা নিৰ্বাচনৰ ভোটগ্ৰহণ প্ৰক্ৰিয়াৰ অন্ত পৰিল ৷ এতিয়া অপেক্ষা 3 ডিচেম্বৰলৈ ৷ সেইদিনাই পাঁচোখন ৰাজ্যৰ ফলাফল ঘোষণা হ’ব ৷ নিৰ্বাচনী সমীক্ষাই কি কয় ফলাফল সন্দৰ্ভত ? এক বিশেষ প্ৰতিবেদন...

নিউজ ডেস্ক, 30 নৱেম্বৰ: অন্ত পৰিল পাঁচ ৰাজ্যৰ বিধানসভা নিৰ্বাচনৰ ভোটগ্ৰহণ ৷ যোৱা 7 নৱেম্বৰৰ পৰা আৰম্ভ হোৱা এই ভোট গ্ৰহণ প্ৰক্ৰিয়া 30 নৱেম্বৰৰ বিয়লি 5 বজাত অন্ত পৰে ৷ অহা 3 ডিচেম্বৰত পাঁচোখন ৰাজ্যৰ ভোট গণনা আৰু ফলাফল ঘোষণা হ’ব একেলগে ৷ ভোটদান প্ৰক্ৰিয়া অন্ত পৰাৰ লগে লগেই সমীক্ষা সংস্থা সমূহে প্ৰকাশ কৰিছে নিৰ্বাচনী সমীক্ষা ৷ কোন কোন সংস্থাই কিদৰে কৰিছে ভোট বিন্যাস ? সেই বিষয়ে জনাৰ আগতে আহক এবাৰ বুজ লওঁ নিৰ্বাচন অনুষ্ঠিত হোৱা পাঁচখন ৰাজ্যৰ ৰাজনৈতিক প্ৰেক্ষাপটৰ ৷

নিৰ্বাচন অনুষ্ঠিত হোৱা পাঁচ ৰাজ্য হৈছে ক্ৰমে মিজোৰাম, ছত্তীশগড়, মধ্যপ্ৰদেশ, ৰাজস্থান আৰু তেলেংগানা ৷ ইয়াৰ ভিতৰত এখন ৰাজ্য বিজেপি শাসিত, দুখন কংগ্ৰেছ শাসিত ৷ মধ্যপ্ৰদেশ বিজেপিৰ দখলত থকাৰ বিপৰীতে ৰাজস্থান আৰু ছত্তীশগড়ত আছে কংগ্ৰেছৰ চৰকাৰ ৷ মিজোৰামত মিজো নেশ্যনেল ফ্ৰন্টৰ সৈতে 1 খন আসনেৰে মিত্ৰতাত আছে বিজেপি ৷ ইফালে তেলেংগানা শাসন কৰি আছে বি আৰ এছে ৷

এইবাৰ নিৰ্বাচনত কোনে শেষ হাঁহি মাৰিব ? এক্সিট প’লে কি কয় ? বিজেপিয়ে কংগ্ৰেছ মুক্ত ভাৰত গঢ়িব পাৰিবনে ? কংগ্ৰেছৰ ‘বিজেপি হাটাও’ শ্ল’গানে কাম দিবনে ? কে চি আৰৰ কি হ’ব ? প্ৰকাশিত এক্সিট প’লত বিভিন্ন সংস্থাই বিভিন্ন ধৰণেৰে পৰ্যবেক্ষণ আগবঢ়োৱা দেখা গৈছে ৷

মিজোৰাম বিধানসভা নিৰ্বাচনৰ এক্সিট প’ল:

মিজোৰামৰ মুঠ বিধানসভাৰ আসনৰ সংখ্যা 40 খন আৰু একক সংখ্যা গৰিষ্ঠতাৰ বাবে প্ৰয়োজন 21 খন আসন ৷ 7 নৱেম্বৰত অনুষ্ঠিত হৈছিল মিজোৰামৰ ভোটগ্ৰহণ ৷

ইণ্ডিয়া টুডে’-এক্সিছৰ মতে মিজোৰামত পুনৰ ক্ষমতালৈ আহিব মিজো নেশ্যনেল ফ্ৰন্ট ৷ তেওঁলোকে MNF ক 16 খন, কংগ্ৰেছক 11 খন আৰু অন্যান্যক 1 খন আসন দিছে ৷ বিজেপিয়ে এখনো আসনত জয়ী নহয় বুলি দাবী কৰে এই এক্সিট প’লে ৷

এবিপি-চি ভোটাৰৰ মতে মিজোৰামত মিজো নেশ্যনেল ফ্ৰন্টে 15-21 খন, জোৰাম পিপলচ্ মুভমেন্টে 12-18 খন, কংগ্ৰেছে 2-8 খন, অন্যান্য 0-5 খন ৷

জন কী বাতৰ সমীক্ষা মতে, মিজো নেশ্যনেল ফ্ৰন্টে 10-14 খন, জোৰাম পিপলচ্ মুভমেন্টে 15-25 খন, কংগ্ৰেছে 5-9 খন, বিজেপিয়ে 0-2 খন আসন লাভ কৰিব ৷

ছত্তীশগড়ৰ বিধানসভা নিৰ্বাচনৰ এক্সিট প’ল:

ছত্তীশগড়ৰ মুঠ বিধানসভা আসনৰ সংখ্যা হৈছে 90 খন আৰু সংখ্যা গৰিষ্ঠতা লাভৰ বাবে প্ৰয়োজন 46 খন ৷ যোৱা 7 আৰু 17 নৱেম্বৰত অনুষ্ঠিত হৈছিল ছত্তীগড় বিধানসভা নিৰ্বাচনৰ ভোট গ্ৰহণ ৷

ইণ্ডিয়া টুডে’-এক্সিছৰ সমীক্ষা মতে ছত্তীশগড়ত কংগ্ৰেছে 40-50, বিজেপি 36-46, অন্যান্য 1-5 খন আসন লাভ কৰিব ৷

টাইমছ নাওৰ সমীক্ষাত দেখা গৈছে যে কংগ্ৰেছ 48-56, বিজেপি 32-40 আৰু অন্যান্য 2-4 খন আসন পাব ৷

এবিপি-চি ভোটাৰৰ সমীক্ষা মতে কংগ্ৰেছে 41-53 আৰু বিজেপিয়ে 36-48 খন আসন লাভ কৰিব ৷

ইণ্ডিয়া টিভিৰ মতে, কংগ্ৰেছে 46-56 আৰু বিজেপিয়ে 30-40 খন আসন লাভ কৰিব ৷

জন কী বাতৰ সমীক্ষা মতে কংগ্ৰেছ 42-53, বিজেপি 34-45 আৰু অন্যান্যই তিনিখন আসন লাভ কৰিব ৷

টিভি9 ভাৰতবৰ্ষ-প’লষ্টাৰৰ মতে কংগ্ৰেছে 40-50, বিজেপি 35-45 আৰু অন্যান্যই 0-3 খন আসন লাভ কৰিব ৷

মধ্য প্ৰদেশ বিধানসভা নিৰ্বাচনৰ এক্সিট প’ল-

মধ্যপ্ৰদেশ বিধানসভাৰ মুঠ আসনৰ সংখ্যা হৈছে 230 আৰু সংখ্যা গৰিষ্ঠতাৰ বাবে প্ৰয়োজন হ’ব 116 খন আসনৰ ৷ যোৱা 17 নৱেম্বৰত অনুষ্ঠিত হৈছিল মধ্যপ্ৰদেশ বিধানসভা নিৰ্বাচনৰ ভোটগ্ৰহণ৷

জন কী বাতৰ সমীক্ষাত দেখা গৈছে যে বিজেপিয়ে মধ্যপ্ৰদেশত 100-123 খন, কংগ্ৰেছে 102-125খন আসন লাভ কৰিব ৷

টিভি9 ভাৰতবৰ্ষ আৰু প’লষ্টাৰৰ মতে বিজেপিয়ে 106-116 খন, কংগ্ৰেছে 111-121 খন আসন লাভ কৰিব ৷

ৰিপাব্লিক মেট্ৰিজৰ মতে বিজেপি 118-130, কংগ্ৰেছ 97-107 আৰু অন্যান্যই 2 খন আসন পাব ৷

আজ টক্ এক্সিছৰ মতে বিজেপি 140-162, কংগ্ৰেছ 68-90 আৰু অন্যান্যই 3 খন আসন লাভ কৰিব ৷

টাইমছ নাওৰ মতে বিজেপি 105-117, কংগ্ৰেছ 109-125, অন্যান্য 1-5 খন আসন লাভ কৰিব ৷

টুডে’ইজ চাণক্যৰ মতে বিজেপিয়ে 139-163, কংগ্ৰেছে 62-86 আৰু অন্যান্যই 1-9 খন আসন লাভ কৰিব ৷

ৰাজস্থান বিধানসভা নিৰ্বাচনৰ এক্সিট প’ল:

ৰাজস্থান বিধানসভা নিৰ্বাচনৰ ভোট গ্ৰহণ অনুষ্ঠিত হয় যোৱা 23 নৱেম্বৰত ৷ ৰাজস্থানৰ মুঠ বিধানসভা আসনৰ সংখ্যা হৈছে 199 খন আৰু সংখ্যা গৰিষ্ঠতাৰ বাবে প্ৰয়োজন 100 খন আসন ৷

ইণ্ডিয়া টুডে’-এক্সিছৰ সমীক্ষা অনুসৰি বিজেপিয়ে 80-100 খন, কংগ্ৰেছে 86-106 খন আৰু অন্যান্যই 9-18 খন আসন পাব ৷

টাইমছ নাওৰ সমীক্ষা মতে, বিজেপিয়ে 108-128, কংগ্ৰেছে 56-72 আৰু অন্যান্যই 13-21 খন আসন লাভ কৰিব ৷

জন কী বাতৰ সমীক্ষা মতে বিজেপিয়ে 100-122 খন, কংগ্ৰেছে 62-85 খন আৰু অন্যান্যই 14-15 খন আসন লাভ কৰিব ৷

টিভি9 ভাৰতবৰ্ষৰ মতে বিজেপিয়ে 100-110 খন, কংগ্ৰেছ 90-100 খন আৰু অন্যান্যই 5-15 খন আসন লাভ কৰিব ৷

এবিপি-চি ভোটাৰৰ মতে কংগ্ৰেছে 71-91খন, বিজেপিয়ে 94-114 খন আৰু অন্যান্যই 9-19 খন আসন লাভ কৰিব ৷

টুডে’ইজ চাণক্যৰ মতে কংগ্ৰেছে 89-113 খন, বিজেপিয়ে 77-101 খন আৰু অন্যান্যই 2-16 খন আসন লাভ কৰিব ৷

তেলেংগানা বিধানসভা নিৰ্বাচনৰ এক্সিট প’ল-

তেলেংগানাত 30 নৱেম্বৰত অনুষ্ঠিত হয় বিধানসভা নিৰ্বাচন ৷ 119 খন আসন বিশিষ্ট তেলেংগানাত সংখ্যা গৰিষ্ঠতাৰ বাবে প্ৰয়োজন 60 খন আসনৰ ৷

টুডে’ইজ চাণক্যৰ নিৰ্বাচনী সমীক্ষা মতে তেলেংগানাত বি আৰ এছে 24-42 খন, কংগ্ৰেছে 62-80, বিজেপিয়ে 2-12 আৰু অন্যান্যই 5-11 খন আসন লাভ কৰিব ৷

টাইমছ নাওৰ সমীক্ষা অনুসৰি বি আৰ এছে 37-45 খন, কংগ্ৰেছে 60-70 খন আৰু অন্যান্যই 6-12 খন আসন লাভ কৰিব ৷

জন কী বাতৰ সমীক্ষা মতে, বিজেপিয়ে 7-13, বি আৰ এছে 40-55, কংগ্ৰেছে 48-64 খন আসন লাভ কৰিব ৷

ৰিপাব্লিক-মেট্ৰিজৰ মতে, বি আৰ এছে 46-56, কংগ্ৰেছে 58-68, বিজেপিয়ে 4-9 আৰু এ আই এম আই এমে 5-7 খন আসন লাভ কৰিব ৷

টিভি9 ভাৰতবৰ্ষৰ সমীক্ষা মতে বি আৰ এছে 48-58 খন, কংগ্ৰেছে 49-59 খন, বিজেপিয়ে 5-10 খন আৰু এ আই এম আই এমে 6-8 খন আসন লাভ কৰিব ৷

এয়া আছিল বিভিন্ন সংস্থাই আগবঢ়োৱা পাঁচ ৰাজ্যৰ নিৰ্বাচনী সমীক্ষা ৷ দেখা গৈছে যে মিজোৰামত প্ৰায় সমূহ সংস্থাই মিজো নেশ্যনেল ফ্ৰন্টে চৰকাৰ গঠন কৰাৰ সম্ভাৱনা প্ৰকাশ কৰিছে ৷ একেদৰে ছত্তীশগড়ত পুনৰবাৰ কংগ্ৰেছৰ চৰকাৰ হোৱাৰ ইংগিত দেখা গৈছে সমীক্ষা সমূহত ৷

ইফালে মধ্যপ্ৰদেশ আৰু ৰাজস্থানত বিজেপি আৰু কংগ্ৰেছৰ মাজত কঠিন প্ৰত্যাহ্বান হ’ব বুলি দাবী কৰিছে সমীক্ষা সমূহত ৷ তাৰ মাজতে প্ৰায়বোৰ সংস্থাই দুয়োখন ৰাজ্যত বিজেপিৰ চৰকাৰ হোৱাৰ সম্ভাৱনা ব্যক্ত কৰিছে ৷

তেলেংগানাত যদিও বি আৰ এছ পুনৰ শাসনলৈ আহিব বুলি কৈ থকা হৈছিল, কিন্তু নিৰ্বাচনী সমীক্ষাত দেখা গৈছে যে, দক্ষিণৰ ৰাজ্যখনত কংগ্ৰেছে চৰকাৰ গঠনৰ সুবিধা লাভ কৰিব পাৰে ৷ সকলো স্পষ্ট হৈ পৰিব অহা 3 ডিচেম্বৰৰ ফলাফল ঘোষণাৰ পিচত ৷

লগতে পঢ়ক:৫ ৰাজ্যৰ এখনতো বিজেপি জয়ী নহয়: অশোক গেহলট