নেশ্যনেল ডেস্ক, 31 অক্টোবৰ : উত্তৰ প্ৰদেশৰ হাৰদৈত শোকাৱহ পথ দুৰ্ঘটনাৰ ঘটনা সংঘটিত হৈছে ৷ এই পথ দুৰ্ঘটনাটোত শিশুসহ এটা পৰিয়ালৰ 5 গৰাকী লোকে মৃত্যুক আকোঁৱালি লয় ৷
হাৰদৈৰ চৱাইজপুৰ কোতৱালী অঞ্চলৰ অন্তৰ্গত বিলহাউৰ-কাটৰা পথৰ খামৰিয়া মৰ্হৰ ওচৰত এই দুৰ্ঘটনাটো সংঘটিত হয়। সোমবাৰে নিশা 10 বজাত ব্যক্তিগত বাহন এখন নিয়ন্ত্ৰণহীন হৈ এডাল গছত খুন্দা মাৰে ৷ লগে লগে এই দুৰ্ঘটনাত এটি চাৰি বছৰীয়া শিশুসহ পাঁচজন লোকৰ মৃত্যু হয় । মৃত লোকসকল পাচদেৱৰা আৰক্ষী থানা অঞ্চলৰ অন্তৰ্গত বাৰাকান্থ গাঁৱৰ বাসিন্দা বুলি কোৱা হৈছে ।
লগে লগে স্থানীয় লোকে দুৰ্ঘটনাটো প্ৰত্যক্ষ কৰি আৰক্ষীক অৱগত কৰে ৷ ঘটনাৰ খবৰ পোৱা মাত্ৰকে হাৰদৈ আৰক্ষী অধীক্ষক, এএছপি নেতৃত্বত আৰক্ষীৰ এটা দল ঘটনাস্থলীত উপস্থিত হয় । দুৰ্ঘটনাস্থলীৰ পৰা আৰক্ষীয়ে মৃত লোকসকলৰ মোবাইল উদ্ধাৰ কৰি পৰিয়ালৰ অন্য লোকক দুৰ্ঘটনাৰ কথা অৱগত কৰে ৷ আৰক্ষীয়ে 5 জন লোককে উদ্ধাৰ কৰি নিকটৱৰ্তী চিকিৎসালয়লৈ লৈ আনিছিল যদিও আটাইকেইজনকে মৃত বুলি ঘোষণা কৰে চিকিৎসকে ৷