নিউজ ডেস্ক, 22 জানুৱাৰী : প্ৰকৃতিতকৈ ভাল বন্ধু কোনো হ’ব নোৱাৰে ৷ প্ৰকৃতিৰ লগত থাকি, প্ৰকৃতিৰ লগত কথা পাতি পাৰ কৰিব পাৰি অৱসৰৰ সময় অথবা ব্যস্ততাৰে ভৰা সময়ৰ পৰা কিছু পৰিত্ৰাণ বিচাৰি প্ৰকৃতিৰ কাষ চাপিব পাৰি ৷ য’ত লাভ কৰিব পাৰি জীৱনৰ অন্য এক মাদকতা ৷ এই কথা আপোনাৰ-মোতকৈও হয়তো য়াছিনৰ মাতৃয়ে ভালদৰে অনুভৱ কৰিছিল ৷ সেইবাবেই বিভিন্ন প্ৰজাতিৰ চৰাই শংকাবিহীনভাৱেই য়াছিনৰ মাতৃৰ পাকঘৰলৈ সঘন অহা-যোৱা কৰিছিল ৷ প্ৰকৃতিপ্ৰেমী মহিলাগৰাকীয়ে নিজ সন্তানৰ দৰে চৰাইবোৰক খুৱাইছিল, লালন-পালন কৰিছিল ৷
শৈশৱতেই এই দৃশ্য প্ৰত্যক্ষ কৰিছিল য়াছিনে ৷ ফলত প্ৰকৃতিৰ অনুপম সৃষ্টি চৰাইৰ প্ৰেমত হাবু-ডুবু খাবলৈ ল’লে য়াছিনে ৷ মাতৃৰ পক্ষীপ্ৰেমে শিশু য়াছিনৰ মন-মগজুত ক্ৰিয়া কৰিলে ৷ এতিয়া য়াছিন বহুত ডাঙৰ হ’ল ৷ পক্ষীপ্ৰেমত বিহ্বল য়াছিনে এতিয়া যি পদক্ষেপ গ্ৰহণ কৰিছে, প্ৰকৃতিক ভালপোৱা প্ৰতিজন লোকৰে অন্তৰ চুই যাব ৷ শ্ৰীনগৰৰ ডাল হ্ৰদৰ বাসিন্দা মহম্মদ য়াছিনেক নিজৰ হাউচবোটৰ কাষতে এখন বাৰ্ড ফৰেষ্ট ৰিজৰ্ট স্থাপন কৰিছে (Bird Forest Resort Kashmir Dal Lake)৷ য’ত দেশী-বিদেশী চৰায়ে খাদ্যগ্ৰহণ কৰে, খেলে ৷
ইটিভি ভাৰতৰ সৈতে হোৱা এক সাক্ষাৎকাৰত য়াছিনে কয় যে উপত্যকাটোত শীতৰ পৰিমাণ বৃদ্ধি পোৱাৰ লগে লগে চৰাইৰ বাবে খাদ্যৰ নাটনি হয় ৷ খাদ্যৰ সন্ধান কৰাত যথেষ্ট অসুবিধাৰ সন্মুখীন হয় চৰাইবোৰ ৷ সেই কথা অনুমান কৰিয়েই য়াছিনে হ্ৰদটোলৈ আগমন ঘটা চৰাইক খাদ্য যোগান ধৰাৰ পদক্ষেপ গ্ৰহণ কৰে ৷ শেহতীয়াকৈ তেওঁ এখন ৰিজ’ৰ্ট স্থাপন কৰিছে, য’ত তেওঁ চৰাইৰ বাবে খাদ্য যোগান ধৰাৰ লগতে ৰিজ’ৰ্টখনলৈ অহা দৰ্শকেও দেশী-বিদেশী চৰাইৰ মাজত থাকি খাদ্য গ্ৰহণৰ অভিজ্ঞতা লাভ কৰিছে (Bird forest resort in Kashmir)৷
য়াছিনে ইটিভি ভাৰতক জনায়- "এই পদক্ষেপৰ উদ্দেশ্য হৈছে চৰাইবোৰক সুৰক্ষা দিয়া আৰু খাদ্যৰ যোগান কৰা ৷ এই প্ৰেৰণা মই মোৰ মাৰ পৰা পাইছিলো । সেইবাবেই মই হ্ৰদটোত থকাৰ সিদ্ধান্ত লৈছিলোঁ, যাতে মই চৰাই আৰু প্ৰকৃতিৰ কাষত থাকিব পাৰো’’ ৷