নিউজ ডেস্ক, ৩০ নৱেম্বৰ :১৭ দিনৰ ৰুদ্ধ-শ্বাস পৰিস্থিতি আৰু কঠোৰ পৰিশ্ৰমৰ অন্তত উত্তৰকাশীৰ চিল্কয়াৰা সুৰংগত আবদ্ধ ৪১ জন শ্ৰমিকক ২৮ নৱেম্বৰৰ নিশা প্ৰায় ৮ বজাত উদ্ধাৰ কৰা হয় । এই উদ্ধাৰ অভিযান ৰাজ্য আৰু কেন্দ্ৰীয় চৰকাৰৰ বাবে এক ডাঙৰ সাফল্য হিচাপে পৰিগণিত হ'ব পাৰে । কিন্তু এই মুহূৰ্তত প্ৰযুক্তিক লৈ এক ডাঙৰ প্ৰশ্ন উত্থাপিত হৈছে ।
দেশৰ প্ৰতিটো মুখ্য প্ৰতিষ্ঠান আৰু বিদেশৰ বিজ্ঞানীসকলে এই উদ্ধাৰ অভিযান চলাবলৈ ইমান দিন কিয় লৈছিল ? লগতে আন এটা বিষয় উত্থাপন হয় যে আধুনিক প্ৰযুক্তি কেনেকৈ বিফল হ'ল ? ভৱিষ্যতে এনে প্ৰত্যাহ্বানৰ মোকাবিলা কৰিবলৈ চৰকাৰে কেনে ধৰণৰ ব্যৱস্থা কৰিব লাগিব ? এই সকলোবোৰ প্ৰশ্নৰ উত্তৰ বিচাৰি ইটিভি ভাৰতে কেইগৰাকীমান বিজ্ঞানীৰ পৰা মতামত গ্ৰহণ কৰে ।
প্ৰথমতে উত্তৰকাশী চিল্কয়াৰা সুৰংগ উদ্ধাৰ অভিযানৰ বিষয়ে অলপ তথ্য দিব বিচাৰিছোঁ । ১২ নৱেম্বৰৰ দীপাৱলীৰ পুৱা প্ৰায় ৫.৩০ বজাত উত্তৰকাশী জিলাৰ চিল্কয়াৰাত নিৰ্মাণৰত চাৰি কিলোমিটাৰ দীঘল সুৰংগটোৰ মুখৰ পৰা প্ৰায় ২০০ মিটাৰ দূৰত ভূমিস্খলন হয় । ইয়াৰ ফলত নিশাৰ ভাগত কাম কৰা ৪১ জন শ্ৰমিক তাত আবদ্ধ হৈ পৰে । তেওঁলোকক তাৰ পৰা উদ্ধাৰ কৰিবলৈ ১৭ দিনৰ উদ্ধাৰ অভিযান চলোৱা হয় ।
এইটো হৈছে ভাৰতৰ প্ৰথম ইমান দীঘলীয়া উদ্ধাৰ অভিযান । আনহাতে, বিশ্বৰ ভিতৰত তৃতীয় দীঘলীয়া উদ্ধাৰ অভিযান । উত্তৰকাশী সুৰংগৰ পৰা উদ্ধাৰ কৰা ৪১ জন শ্ৰমিকক আজি ঘৰলৈ পঠোৱাৰ সম্ভাৱনা আছে । তেওঁলোক সকলোকে ঋষিকেশ এইমছত ভৰ্তি কৰোৱা হৈছিল ।
কেন্দ্ৰীয় আৰু ৰাজ্য চৰকাৰৰ সকলো সংস্থাৰ লগতে বিদেশী বিশেষজ্ঞ আৰু যন্ত্ৰপাতিও সুৰংগটোত আবদ্ধ শ্ৰমিকসকলক উলিয়াবলৈ ব্যৱহাৰ কৰা হৈছিল । কিন্তু এই সকলোবোৰেই ৬০ মিটাৰ দীঘল ধ্বংসাৱশেষ আঁতৰোৱাত ব্যৰ্থ হৈছিল । আমেৰিকান অগাৰ যন্ত্ৰটোৱেও অৱশেষত হাত দাঙি দিয়ে । যেতিয়া উদ্ধাৰৰ সকলো পথ বন্ধ হৈ পৰিছিল, বিশেষজ্ঞসকলে তেতিয়া শতিকা পুৰণি ৰেট হোল খনন কৌশলৰ আশ্ৰয় লয় । উল্লেখ্য যে ২০১৪ চনত ৰাষ্ট্ৰীয় সেউজ ন্যায়াধিকৰণে (এনজিটি) এই খনন কৌশল বন্ধ কৰিছিল ।
অৱশেষত ১০ মিটাৰৰ আৱৰ্জনা ৰেট হোল খনন বিশেষজ্ঞই আঁতৰাই পেলাইছিল আৰু তাৰ পিছতহে ৪১ জন শ্ৰমিকক সুৰংগটোৰ পৰা উলিয়াই আনিব পৰা গৈছিল । এই সন্দৰ্ভত যোগাযোগ কৰাত ইউকাষ্টৰ (উত্তৰাখণ্ড ষ্টেট কাউন্সিল ফৰ ছাইট এণ্ড টেকন'লজী) সঞ্চালক ডঃ দুৰ্গেশ পন্তে কয়, "প্ৰযুক্তিৰ লগতে আমাৰ নিজৰ পৰম্পৰাগত জ্ঞান ব্যৱহাৰ কৰা উচিত । এই দুয়োটাৰ সংমিশ্ৰণ হৈছে আটাইতকৈ শক্তিশালী মাধ্যম, যাক সমগ্ৰ বিশ্বতে ব্যৱহাৰ কৰা হয় । উত্তৰকাশীৰ অভিযান ৰেট হোল শৈলীত সম্পূৰ্ণ হৈছে । যিটো হৈছে শতিকা পুৰণি পদ্ধতি আৰু বৰ্তমান এনজিটিয়ে ইয়াক নিষিদ্ধ কৰিছে ।
ডঃ দুৰ্গেশ পন্তৰ মতে, সকলো কাম প্ৰয়োজন অনুসৰি কৰা হয় । য'ত ড্ৰিলিঙৰ প্ৰয়োজন আছিল, তাত প্ৰযুক্তি অৰ্থাৎ ডাঙৰ যন্ত্ৰ ব্যৱহাৰ কৰা হৈছিল । য'ত যন্ত্ৰবোৰে কাম কৰিব নোৱাৰিলে, তাত হাতেৰে কাম কৰা হৈছিল । এই উদ্ধাৰ অভিযানকো বিশেষজ্ঞসকলে একে ধৰণে চলাইছিল ।
আনহাতে, জেএনইউৰ দুৰ্যোগ গৱেষণাৰ বিশেষ কেন্দ্ৰৰ অধ্যাপক পি কে যোশীয়ে কয় যে উদ্ধাৰকাৰী দলটোৰ অগ্ৰাধিকাৰ আছিল সুৰংগটোত আবদ্ধ হৈ থকা ৪১ জন শ্ৰমিকক উদ্ধাৰ কৰা । ইয়াত দলটো সফলো হৈছে । এই উদ্ধাৰ অভিযানত নতুন প্ৰযুক্তি আৰু পৰম্পৰাগত পদ্ধতি দুয়োটা ব্যৱহাৰ কৰা হৈছিল, যিটো নিজেই এক অনন্য পৰীক্ষা আছিল । কাৰণ ইয়াৰ পূৰ্বে এইটো কেতিয়াও হোৱা নাছিল ।
অধ্যাপক পিকে যোশীয়ে কয় যে উদ্ধাৰকাৰী দলে বিশ্বৰ শেহতীয়া প্ৰযুক্তি আৰু যন্ত্ৰপাতি ব্যৱহাৰ কৰিছিল । কিন্তু প্ৰতিকূল পৰিস্থিতি আৰু প্ৰত্যাহ্বানৰ সন্মুখীন হৈ তেওঁলোক সকলো বিমুখ হৈ পৰিছিল । ইয়াৰ পিছত ৰেট হোল খনিকৰ্মীসকলে ইয়াৰ আশ্ৰয় লৈছিল । আৰু তাত সফলো হয় । উত্তৰকাশী চিল্কয়াৰা সুৰংগ উদ্ধাৰ অভিযান বিশ্বৰ বাবে এক উদাহৰণ হ'ব পাৰে । ইয়াক বিস্তৃত অধ্যয়ন কৰিব পাৰি ।
উল্লেখ্য যে এই ঘটনাটো কেৱল উত্তৰাখণ্ডৰ বাবেই নহয়, সমগ্ৰ দেশৰ বাবেও এটা শিক্ষা । সেইকাৰণেই কেন্দ্ৰীয় চৰকাৰে ভৱিষ্যতে এনে দুৰ্ঘটনা প্ৰতিহত কৰিবলৈ ইতিমধ্যে সুৰংগসমূহৰ সুৰক্ষা ব্যৱস্থা নিৰীক্ষণৰ নিৰ্দেশ দিছে । উত্তৰাখণ্ডতো ৰে'ল আৰু পথ সম্পৰ্কীয় বহুতো সুৰংগ প্ৰকল্প চলি আছে । এই সকলোবোৰ প্ৰকল্প কেন্দ্ৰীয় চৰকাৰৰ । কিন্তু উত্তৰাখণ্ড চৰকাৰে সকলো প্ৰকল্পৰ পৰ্যালোচনা কৰিব বুলি মুখ্যমন্ত্ৰী পুষ্কৰ সিং ধামীয়ে নিজে জনাইছে ।
লগতে পঢ়ক :উত্তৰকাশী উদ্ধাৰ অভিযান বিশ্বৰ আটাইতকৈ দীঘলীয়া মানৱ উদ্ধাৰ অভিযানৰ অন্যতম
