নেশ্যনেল ডেস্ক, ৭ এপ্ৰিল: বুধবাৰে ৰাষ্ট্ৰীয় অনুসন্ধান সংস্থা (নিয়া)ৰ কাৰ্যালয়ত হাজিৰ হয় মুম্বাইৰ প্ৰাক্তন আৰক্ষী আয়ুক্ত পৰম বীৰ সিং । ৰিলায়েন্স ইণ্ডাষ্ট্ৰিজৰ অধ্যক্ষ মুকেশ আম্বানীৰ বাসগৃহৰ বাহিৰত বিস্ফোৰক ভৰ্তি এছইউভি ৰখা সন্দৰ্ভত প্ৰথমবাৰৰ বাবে নিয়াৰ কাৰ্যালয়ত হাজিৰ হয় । এছইউভি কাণ্ডত ব্যৱসায়ী মনসুখ হীৰেনৰ ৰহস্যজনকভাৱে মৃত্যু হোৱাৰ পাচত ঘটনাটোৱে এক নতুন ৰূপ লয় । বুধবাৰে পুৱা তেওঁ পোনপটীয়াকৈ সন্ত্ৰাসবাদ বিৰোধী অনুসন্ধান সংস্থাৰ কাৰ্যালয়ৰ ভিতৰলৈ যায় ।
সূত্ৰ অনুসৰি, যোৱা ২৫ ফেব্ৰুৱাৰীত এণ্টিলিয়াৰ বাহিৰত উদ্ধাৰ হোৱা এক বিস্ফোৰক ভৰ্তি এছইউভি ৰখা সন্দৰ্ভত সিঙক সংস্থাটোৱে সোধ-পোছ কৰিব । ইয়াৰ পূৰ্বে, নিয়াই অপৰাধ শাখাৰ আৰক্ষী বিষয়া শচীন ৱাজেকে ধৰি কেইবাজনো লোকক গ্ৰেপ্তাৰ কৰিছে । নিয়াই ৱাজেই ব্যৱহাৰ কৰা কেইবাখনো বিলাসী বাহন জব্দ কৰাৰ লগতে আৰু এখন নদীৰ পৰা কেইবাটাও সামগ্ৰী উদ্ধাৰ কৰিছিল ।