কৰ'ণাৰ বাবে বন্ধ শ্ৰী কাশী বিশ্বনাথ মন্দিৰৰ মূল দুৱাৰ

দ্ৰুতগতিত কৰ'ণাত আক্ৰান্ত লোকৰ সংখ্যা বৃদ্ধি পোৱাৰ প্ৰতি লক্ষ্য ৰাখি শ্ৰী কাশী বিশ্বনাথ মন্দিৰৰ মূল দুৱাৰ বন্ধ ৰাখি ভক্তসকলৰ প্ৰৱেশ নিষিদ্ধ কৰা হৈছে । শুকুৰবাৰৰ সন্ধিয়াৰে পৰা ভক্তসকলৰ প্ৰৱেশ নিষিদ্ধ কৰা হ'ব ।

নেশ্যনেল ডেস্ক, ১০ এপ্ৰিল: দেশত দ্ৰুত গতিত বৃদ্ধি পাবলৈ ধৰিছে কৰ'ণাত আক্ৰান্ত লোকৰ সংখ্যা । তাৰ বাবে কোনো স্থানত ৰাজ্যৰ প্ৰশাসনসমূহে লক ডাউন, নৈশ সান্ধ্য আইন জাৰি কৰিছে । দ্ৰুতগতিত কৰ'ণাত আক্ৰান্ত লোকৰ সংখ্যা বৃদ্ধি পোৱাৰ প্ৰতি লক্ষ্য ৰাখি শ্ৰী কাশী বিশ্বনাথ মন্দিৰৰ মূল দুৱাৰ বন্ধ ৰাখি ভক্তসকলৰ প্ৰৱেশ নিষিদ্ধ কৰা হৈছে । শুকুৰবাৰৰ সন্ধিয়াৰে পৰা ভক্তসকলৰ প্ৰৱেশ নিষিদ্ধ কৰা হ'ব । এনে পৰিস্থিতিত, সকলোৰে সুৰক্ষাৰ যত্ন লোৱাটো গুৰুত্বপূৰ্ণ বুলি কৈ মন্দিৰ কৰ্তৃপক্ষই জাৰি কৰে এই নিৰ্দেশ ।

মন্দিৰৰ বাহিৰতে ভক্তসকলে পূজা-পাঠ কৰিব পাৰিব । ইয়াৰোপৰি, মন্দিৰ কৰ্তৃপক্ষই পৰৱৰ্তী নিৰ্দেশ গ্ৰহণ নকৰা পৰ্যন্ত মঙ্গলা আৰতিৰ টিকট বিক্ৰীও নিষিদ্ধ কৰিছে । ইফালে, দশশ্বমেধ ঘাটত ভক্তসকলৰ নিয়মীয়া গংগা স্নান আৰু আৰতিও ক'ভিড নীতি-নিয়মেৰে পালন কৰিব লাগিব বুলি বাৰাণসীৰ জিলা দণ্ডাধীশে নিৰ্দেশ জাৰি কৰে ।

লগতে বৃহস্পতিবাৰৰ পৰা মাত্ৰ এজন পুৰোহিতে আৰতি সম্পন্ন কৰিছে । এই সময়ছোৱাত কোনো কাৰনতে দুজনক অনুমতি প্ৰদান কৰা নহ'ব বুলি উক্ত আদেশত উল্লেখ কৰে ।

লগতে পঢ়ক: কৰ'ণাত আক্ৰান্ত আৰএছএছৰ মুৰব্বী মোহন ভাগৱত