নেচনেল ডেস্ক, 23 জুন : প্ৰৱৰ্তন সঞ্চালকালয়ে(ED) বুধবাৰে বিজয় মালিয়া, নীৰৱ মোডী আৰু মেহুল চৌকচি সম্পৰ্কীয় গোচৰত জব্দ কৰা ৯,৩৭১.১৭ কোটি টকাৰ সম্পত্তি ৰাজহুৱা খণ্ডৰ বেংক (PSBs) আৰু কেন্দ্ৰীয় চৰকাৰলৈ স্থানান্তৰ কৰে । ইডিয়ে অভিযুক্ত কেইজনৰ পৰা এতিয়ালৈকে ১৮,১৭০.০২ কোটি টকাৰ সম্পত্তি জব্দ কৰিছে । ইডিয়ে টুইটযোগে জনায় যে, "প্ৰৱৰ্তন সঞ্চালকালয়ে কেৱল বিজয় মালিয়া, নীৰৱ মোডী আৰু মেহুল চৌকচিৰ ক্ষেত্ৰত পিএমএলএৰ অধীনত ১৮,১৭০.০২ কোটি টকাৰ (বেংকৰ মুঠ লোকচানৰ ৮০.৪৫%) মূল্যৰ সম্পত্তি জব্দ কৰাই নহয়, পিএছবি আৰু কেন্দ্ৰীয় চৰকাৰক ৯৩৭১.১৭ কোটি টকাৰ সংলগ্ন/জব্দ কৰা সম্পত্তিৰ এটা অংশ স্থানান্তৰ কৰিছে" ৷
প্ৰৱৰ্তন সঞ্চালকালয়ে এক প্ৰেছ বিজ্ঞপ্তিত যোগে জানিবলৈ দিছে যে, "আজিলৈকে জব্দ কৰা সম্পত্তিৰ ভিতৰত Money Laundering Act, 2002 (PMLA)ৰ অধীনত মুঠ জব্দ কৰা সম্পত্তিৰ ভিতৰত 329.67 কোটি টকাৰ সম্পত্তি জব্দ কৰা হৈছে ৷ লগতে 9041.5 কোটি টকাৰ সম্পত্তি প্ৰতিনিধিত্ব কৰি মুঠ বেংকৰ 40 শতাংশ লোকচান হস্তান্তৰ কৰা হৈছে" ৷ উল্লেখ্য যে, বিজয় মালিয়া, নীৰৱ মোডী আৰু মেহুল চৌকচিয়ে তেওঁলোকৰ কোম্পানীৰ জৰিয়তে পুঁজি আত্মসাৎ কৰি বিভিন্ন ৰাজহুৱা খণ্ডৰ বেংকক প্ৰৱঞ্চনা কৰিছিল ৷ যাৰ ফলত বেংকসমূহৰ লোকচান হৈছিল 22,585.83 কোটি টকা ।
ইডিৰ বিজ্ঞপ্তিত লগতে জনোৱা হৈছে যে, চিবিআই(CBI)ৰ এজাহাৰৰ ওপৰত ভিত্তি কৰি ইডিয়ে চলোৱা অনুসন্ধানে পুনৰ এবাৰ প্ৰমাণ কৰিলে যে, তিনিওজন অভিযুক্তই তেওঁলোকৰ দ্বাৰা নিয়ন্ত্ৰিত ভুৱা প্ৰতিষ্ঠান ব্যৱহাৰ কৰিছিল ৷ বেংকবোৰে প্ৰদান কৰা পুঁজি আত্মসাৎ কৰাৰ বাবে এনে পন্থা অৱলম্বন কৰিছিল অভিযুক্ত কেইজনে । জব্দ কৰা ১৮,১৭০.০২ কোটি টকাৰ সম্পত্তিৰ ভিতৰত আছে বিদেশত থকা ৯৬৯ কোটি টকাৰ সম্পত্তি । পিএমএলএ তদন্ত সম্পূৰ্ণ হোৱাৰ পিছত তিনিওজন অভিযুক্তৰ বিৰুদ্ধে বৃটেইন (UK), এণ্টিগুয়া আৰু বাৰ্বুডালৈ প্ৰত্যাৰ্পণৰ অনুৰোধৰ লগতে গোচৰৰ অভিযোগ দাখিল কৰা হৈছে ।