নিউজ ডেস্ক, 4 অক্টোবৰ: দিল্লীৰ বহুচৰ্চিত সুৰা কেলেংকাৰীৰ গোচৰত প্ৰৱৰ্তক সঞ্চালকালয়ে (ED) বুধবাৰে গ্ৰেপ্তাৰ কৰে আম আদমী পাৰ্টীৰ সাংসদ সঞ্জয় সিঙক ৷ প্ৰায় 10 ঘন্টাজুৰি চলা সোধা-পোছাৰ অন্তত বিয়লি 5.15 বজাত গ্ৰেপ্তাৰ কৰা হয় আপৰ সাংসদগৰাকীক ৷ ইয়াৰ পূৰ্বে ED ৰ দলে সাংসদ সিঙৰ দিল্লীস্থিত চৰকাৰী বাসগৃহত অভিযান চলায় ৷
জানিব পৰা মতে, সঞ্জয় সিঙক গ্ৰেপ্তাৰ কৰি ED য়ে ইয়াৰ মুখ্য কাৰ্যালয়লৈ লৈ যায় ৷ ওৰেটো ৰাতি লক আপতে থাকিব সঞ্জয় সিং ৷ বৃহস্পতিবাৰে পুৱা তেওঁক আদালতত হাজিৰ কৰোৱা হ’ব ৷ অৰবিন্দ কেজৰিৱালৰ পিচত সঞ্জয় সিং এতিয়া আম আদমী পাৰ্টিৰ একমাত্ৰ পৰিচিত তথা সৰব মুখ । এতিয়া তেওঁকো গ্ৰেপ্তাৰ কৰা হৈছে । বিশেষ কথাটো হ’ল সুৰা কেলেংকাৰীত এতিয়ালৈকে যিকেইজন গ্ৰেপ্তাৰ হৈছে, তেওঁলোকৰ কোনেও জামিন লাভ কৰিবলৈ সক্ষম হোৱা নাই।
ED ৰ অভিযোগনামাত সঞ্জয় সিঙৰ বিৰুদ্ধে গুৰুতৰ অভিযোগ
1. সুৰা কেলেংকাৰীৰ অভিযুক্ত দীনেশ অৰোৰাই মুখ্যমন্ত্ৰী অৰবিন্দ কেজৰিৱালক তেওঁৰ বাসগৃহত সাক্ষাৎ কৰিছিল । এই বৈঠকত সঞ্জয় সিঙো উপস্থিত আছিল ।
2. দীনেশ অৰোৰাৰ বক্তব্য অনুসৰি তেওঁ প্ৰথমে সঞ্জয় সিঙক এটা অনুষ্ঠানত লগ পাইছিল । ইয়াৰ পিছত তেওঁ মনীষ চিছ’দিয়াৰ সংস্পৰ্শলৈ আহে ।
3. সঞ্জয় সিঙৰ নিৰ্দেশত দীনেশ অৰোৰাই বহু ৰেষ্টুৰেণ্টৰ মালিকৰ সৈতে কথা পাতি দিল্লীৰ আগন্তুক নিৰ্বাচনৰ বাবে দলীয় ধন সংগ্ৰহ কৰে ।
4. EDয়ে অভিযোগ কৰিছে যে সঞ্জয় সিঙে দীনেশ অৰোৰাৰ এটা গোচৰ আবকাৰী বিভাগত বিচাৰাধীন হৈ আছিল ।
সঞ্জয় সিঙে পুৱা এখন ছবি পোষ্ট কৰি ঠাট্টা কৰিছিল:
পুৱা যেতিয়া অভিযান আৰম্ভ হৈছিল, সঞ্জয় সিঙে ছ’চিয়েল মিডিয়াত এখন ছবি পোষ্ট কৰে ৷ ছবিখনৰ জৰিয়তে তেওঁ কটুভাৱে লিখিছে, "ফক্কাদ হাউচলৈ ED ক আদৰণি জনোৱা হৈছে ।" ED ৰ অভিযানক লৈ আপে তীব্ৰ প্ৰতিক্ৰিয়া প্ৰকাশ কৰিছিল । একে সময়তে সিঙক গ্ৰেপ্তাৰ কৰাৰ খবৰৰ পিছত তেওঁৰ বাসগৃহৰ বাহিৰত বহু সমৰ্থক গোট খাই সজোৰে উত্থাপন কৰে বিভিন্ন শ্লোগান ।
মুখ্যমন্ত্ৰী অৰবিন্দ কেজৰিৱালে কয়, "যোৱা এবছৰ ধৰি তথাকথিত সুৰা কেলেংকাৰীক লৈ হুলস্থুল চলি আছে, কিন্তু তেওঁলোকে এটকাও নাপালে । এহেজাৰতকৈ অধিকবাৰ অভিযান চলায়ো ক'তো একো পোৱা নগ'ল । একেদৰে সঞ্জয় সিঙৰ ঘৰতো একো পোৱা নাযাব । এয়া এজন পৰাজিত মানুহৰ হতাশজনক প্ৰচেষ্টা ।"
সুৰা কেলেংকাৰীত গ্ৰেপ্তাৰ হ’ল আপৰ দ্বিতীয়জন নেতা:
সুৰা কেলেংকাৰীৰ অভিযোগত আপৰ শীৰ্ষ নেতাসকলৰ বিৰুদ্ধে ব্যাপকভাৱে অভিযান চলি আছে । সঞ্জয় সিঙক গ্ৰেপ্তাৰ কৰাৰ পূৰ্বে CBI আৰু ED য়ে কেজৰিৱাল চৰকাৰৰ তদানীন্তন উপ-মুখ্যমন্ত্ৰী মনীষ ছিছোদিয়াক গ্ৰেপ্তাৰ কৰিছিল । ইয়াৰ পিছত ছিছোদিয়াই মন্ত্ৰী পদৰ পৰা পদত্যাগ কৰিবলগীয়া হয় ।
সুৰা কেলেংকাৰী কি ?
দিল্লীৰ কেজৰিৱাল চৰকাৰে ২০২১ চনৰ ১৭ নৱেম্বৰত নতুন সুৰা নীতি কাৰ্যকৰী কৰিছিল । ইয়াৰ অধীনত ৰাজধানীত ৩২টা জ’ন সৃষ্টি কৰি প্ৰতিটো জ’নত ২৭খন দোকান খোলাৰ প্ৰস্তুতি চলোৱা হয় । এইদৰে মুঠ ৮৪৯ খন দোকান খোল খালেহেঁতেন । বিশেষ কথাটো হ’ল এই নীতিত সকলো সুৰাৰ দোকান ব্যক্তিগতকৰণৰ ব্যৱস্থা আছিল । ইয়াৰ পূৰ্বে ৬০ শতাংশ দোকান চৰকাৰী আৰু ৪০ শতাংশ ব্যক্তিগত আছিল । নতুন নীতিত চৰকাৰে যুক্তি দিছিল যে ইয়াৰ ফলত ৩৫০০ কোটি টকাৰ লাভ হ’ব । লগতে চৰকাৰে অনুজ্ঞাপত্ৰৰ মাচুল বহুগুণ বৃদ্ধি কৰিছিল ।
লগতে পঢ়ক:Bihar Land For Job Scam : ভূমিৰ বিনিময়ত চাকৰি কেলেংকাৰী; লালু, ৰাবৰী আৰু তেজস্বী যাদৱক জামিন প্ৰদান
