নেশ্যনেল ডেস্ক, 27 এপ্ৰিল : অসমৰ অন্যতম উগ্ৰপন্থী সংগঠন ডিমাছা নেশ্যনেল লিবাৰেচন আৰ্মীয়ে বৃহস্পতিবাৰে নতুন দিল্লীত গৃহমন্ত্ৰী অমিত শ্বাহ আৰু অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ উপস্থিতিত অসম চৰকাৰৰ সৈতে এক শান্তি চুক্তিত স্বাক্ষৰ কৰে (MoU between DNLA and Govt) ৷ উগ্ৰপন্থী সংগঠনটোৱে MoU ত স্বাক্ষৰ কৰাৰ পাচতেই অমিত শ্বাহে কয় যে, অসমত আৰু এতিয়াৰে পৰা কোনো জনজাতীয় উগ্ৰপন্থী সংগঠন নাই (peace agreement) ৷ ইয়াৰ লগে লগে অসমৰ সকলো জনজাতীয় উগ্ৰপন্থী সংগঠন মূলসুঁতিলৈ অৰ্থাৎ শান্তি আলোচনালৈ ঘূৰি আহিছে বুলিও উল্লেখ কৰে শ্বাহে ।
বুজাবুজি চুক্তি অনুসৰি (MoU between DNLA and Govt) , ডিএনএলএ য়ে সকলো অস্ত্ৰ-শস্ত্ৰ ত্যাগ কৰিব আৰু সংবিধান মানি চলিব । মুঠ ১৭৯ জন ডিএনএলএ কেডাৰে তেওঁলোকৰ অস্ত্ৰ-শস্ত্ৰ আৰু গোলা-বাৰুদ সমৰ্পণ কৰিব । ডিমাছা জনজাতীয় অঞ্চলৰ উন্নয়নৰ বাবে কেন্দ্ৰ আৰু ৰাজ্য চৰকাৰৰ প্ৰত্যেকেই ৫০০ কোটি টকাকৈ আগবঢ়াব ।
কেন্দ্ৰীয় গৃহমন্ত্ৰী অমিত শ্বাহে এই চুক্তি সন্দৰ্ভত কয় যে, উত্তৰ-পূবৰ বাবে আন এক গুৰুত্বপূৰ্ণ দিন । স্থায়ী শান্তিৰ বাবে আজি অসম চৰকাৰ আৰু ডিমাছা নেশ্যনেল লিবাৰেশ্যন আৰ্মী চমুকৈ ডিএনএলএয়ে শান্তি চুক্তিত স্বাক্ষৰ কৰে । ডিএনএলএই প্ৰধানমন্ত্ৰীৰ ওপৰত আস্থা প্ৰকাশ কৰি অস্ত্ৰ-শস্ত্ৰ জমা দিছে ৷ প্ৰধানমন্ত্ৰী নৰেন্দ্ৰ মোদীয়ে অঞ্চলটোত শান্তি প্ৰতিষ্ঠা কৰাৰ লগতে উন্নয়ন সুনিশ্চিত কৰিছে ।
তেওঁ লগতে কয়, বুজাবুজি চুক্তিত ডিএনএলএৰ প্ৰতিনিধিসকলে উগ্ৰপন্থা চিৰদিনৰ বাবে ত্যাগ কৰি সকলো অস্ত্ৰ-শস্ত্ৰ আৰু গোলা-বাৰুদ জমা দি আত্মসমৰ্পণ কৰি নিজৰ সশস্ত্ৰ সংগঠন ভংগ কৰিছে ৷ ডিএনএলএৰ কেডাৰে দখল কৰি থকা সকলো শিবিৰ খালী কৰি আইনৰ দ্বাৰা প্ৰতিষ্ঠা কৰা শান্তিপূৰ্ণ গণতান্ত্ৰিক প্ৰক্ৰিয়াত যোগদান কৰিবলৈ সন্মত হৈছে ।