নেশ্য়নেল ডেস্ক, ১৯ছেপ্টেম্বৰ:অতি সম্প্ৰতি দেশত দ্ৰুত গতিত বৃদ্ধি পাবলৈ ধৰিছে ডেংগুত আক্ৰান্ত লোকৰ সংখ্যা (Dengue cases increasing in India)। ঠায়ে ঠায়ে পানী জমা হোৱাৰ বাবে ডেংগু মহৰ বংশ বৃদ্ধি পাইছে । বিশেষজ্ঞসকলৰ মতে এই কাৰণেই ডেংগুত আক্ৰান্ত ৰোগীৰ সংখ্যা বৃদ্ধি পাবলৈ ধৰিছে । উল্লেখ্য় যে ডেংগু (Dengue)হৈছে মহৰ দ্বাৰা হোৱা ৰোগ ।
দেশৰ ৰাজধানী দিল্লীত ডেংগুত আক্ৰান্ত ৰোগীৰ সংখ্যা বৃদ্ধি পাইছে । যোৱা এসপ্তাহত শতাধিক লোক এই ভাইৰাছত আক্ৰান্ত হৈছে । এই তথ্য় সদৰি কৰিছে স্বাস্থ্য় বিভাগে । স্বাস্থ্য় বিভাগৰ সূত্ৰ অনুসৰি ৰাজধানী চহৰখনত ৰোগীৰ সংখ্যা চলিত বছৰটোত বৰ্তমানলৈকে ৪০০ হৈছেগৈ । ইপিনে,সোমবাৰে প্ৰকাশিত এক প্ৰতিবেদন অনুসৰি এই মাহত ১৭ ছেপ্টেম্বৰলৈ ১৫২ গৰাকী লোক আক্ৰান্ত হৈছে । উল্লেখ্য় যে চহৰখনত ৯ ছেপ্টেম্বৰলৈকে ২৯৫ টা ডেংগুত আক্ৰান্ত ৰোগীক চিনাক্ত কৰা হৈছে । লক্ষ্যনীয় যে, যোৱা এসপ্তাহতে ১০১ গৰাকী নতুন কৈ আক্ৰান্ত হৈছে । অৱশ্য়ে এই বছৰত এতিয়ালৈকে কোনো ৰোগীৰ মৃত্যু হোৱা নাই ।