নেশ্যনেল ডেস্ক,২৩ মে':হায়দৰাবাদত চাঞ্চল্যকৰ ঘটনা । তৃতীয় মহলাৰ পৰা পৰি গুৰুতৰভাৱে আহত এজন ডেলিভাৰী এজেণ্ট (Delivery agent injured after falling from building)। জানিব পৰা মতে পোহনীয়া কুকুৰৰ পৰা নিজকে ৰক্ষা কৰিবলৈ গৈ তৃতীয় মহলাৰ পৰা তলত পৰে এজেণ্টজন । ততালিকে হাস্পতালত ভৰ্তি কৰা হৈছে যুৱকজনক ।
হায়দৰাবাদৰ পঞ্চৱতী কলনীৰ শ্ৰীনিধি হাইটছ এপাৰ্টমেণ্টত সংঘটিত হৈছে এই ঘটনা (Srinidhi Heights apartment incident)। এজন ডেলিভাৰী এজেণ্টে গ্ৰাহকৰ পোহনীয়া কুকুৰৰ আক্ৰমণৰ পৰা নিজকে বচাবলৈ চেষ্টা কৰোতে পিছলি পৰিছিল । দেওবাৰে আবেলি সংঘটিত এই ঘটনাত গুৰুতৰভাৱে আঘাতপ্ৰাপ্ত হয় ডেলিভাৰী এজেণ্ট হিচাপে কাম কৰা যুৱকজন । আৰক্ষীয়ে জনোৱা মতে, এখন তুলী দিবলৈ আহিছিল ডেলিভাৰী এজেণ্টজনে । কিন্তু গ্ৰাহকৰ পোহনীয়া কুকুৰে তেওঁ খেদি আহে আৰু তেওঁ আক্ৰমণ পৰা ৰক্ষা পাবলৈ দৌৰে যদিও পিছলি তলত পৰে (Delivery agent jumps off 3rd floor)।
হায়দৰাবাদত এই বছৰটোতে দুটাকৈ অনুৰূপ ঘটনা সংঘটিত হৈছে । আৰক্ষীয়ে জনোৱা মতে ৩০ বছৰীয়া যুৱকজনে যেতিয়া তুলীখন দিবলৈ গৈছিল পোহনীয়া কুকুৰটোৱে গ্ৰাহকৰ দুৱাৰৰ সন্মুখত ভুকিবলৈ আৰম্ভ কৰিছিল । কুকুৰটোক আংশিকভাৱে মুকলি কৰি থোৱা আছিল বুলি জানিব পৰা গৈছে । দুৱাৰখন খোলাৰ লগে লগে কুকুৰটোৱে এজেণ্টজনৰ ফালে চোঁচা লয় । ইলিয়াছ নামৰ এজেণ্টজনে কুকুৰৰ পৰা নিজকে বচাবলৈ দেৱালৰ ওপৰেৰে জঁপিয়ায় ।