দিল্লী আদালতে ২৭ জুলাইলৈ স্থগিত ৰাখিলে সুনন্দা পুষ্কৰৰ মৃত্যুৰ গোচৰৰ শুনানি

সুনন্দা পুষ্কৰৰ মৃত্যুৰ সৈতে স্বামী শশী থাৰুৰ জড়িত থকা বুলি উত্থাপিত হোৱা অভিযোগ সন্দৰ্ভত ৰুজু হোৱা গোচৰৰ শুনানি দিল্লী আদালতে ২৭ জুলাইলৈ শুনানি স্থগিত কৰিছে । বৰ্তমান জামিন লাভ কৰিছে শশী থাৰুৰে ।

নেশ্যনেল ডেস্ক, ২ জুলাই: পুনৰ সুনন্দা পুষ্কৰৰ মৃত্যুৰ ঘটনাৰ গোচৰৰ শুনানি স্থগিত ৰাখিলে দিল্লীৰ ৰাউজ এভিনিউ আদালতে(Rouse Avenue Court) । শুকুৰবাৰে গোচৰটোৰ শুনানি গ্ৰহণ কৰাৰ কথা আছিল যদিও আদালতে ২৭ জুলাইলৈ স্থগিত ৰাখে । সুনন্দা পুষ্কৰৰ মৃত্যুৰে স্বামী তথা প্ৰাক্তন কেন্দ্ৰীয় মন্ত্ৰী শশী থাৰুৰ জড়িত থকাৰ অভিযোগ তুলি ভাৰতীয় দণ্ডবিধি আইনৰ ধাৰা 498-A আৰু 306 ৰ অধীনত এই গোচৰ ৰুজু কৰা হৈছিল । অৱশ্যে, বৰ্তমান জামিনত আছে শশী থাৰুৰ ।

সুনন্দা পুষ্কৰৰ পৰিয়ালে শশী থাৰুৰৰ বিৰুদ্ধে আত্মহত্যাৰ বাবে প্ৰৰোচিত কৰাৰ অভিযোগ উত্থাপন কৰিছিল । বিশেষ ন্যায়াধীশ গীতাঞ্জলি গোৱেলে দুয়ো পক্ষৰ যুক্তি শুনাৰ পিছত আদেশ স্থগিত ৰাখে । চৰকাৰী অধিবক্তাই যুক্তি দৰ্শাইছিল যে, পুষ্কৰ মানসিক অত্যাচাৰৰ বলি হৈছিল আৰু তাৰ পৰিণতিতে তেওঁৰ স্বাস্থ্যৰ অৱস্থা বেয়া হৈছিল । তেওঁ লগতে কৈছিল যে, এয়া দুৰ্ভাগ্যজনক মৃত্যু নহয় ।

মৰণোত্তৰ পৰীক্ষাৰ প্ৰতিবেদন অনুসৰি বিষক্ৰিয়াৰ ফলতহে সুনন্দা পুষ্কৰৰ মৃত্যু হৈছে । সেই বিষক্ৰিয়া প্ৰকৃততে সুনন্দাই নিজে লৈছিল নে স্বামীয়ে দিছিল সেয়া স্পষ্ট নহয় । তেওঁ লগতে কৈছিল যে, স্বামীৰ বিশ্বাসঘাটকতাৰ বাবেই মানসিক অশান্তিত ভুগি আছিল সুনন্দা পুস্কৰে ।

ইফালে, থাৰুৰৰ অধিবক্তা বিকাশ পাহৱাই কয় যে, এই সকলো যুক্তিৰ সপক্ষে অভিযোগকাৰীয়ে নেতাজনৰ বিৰুদ্ধে কোনো প্ৰমাণ দাঙি ধৰিবলৈ সক্ষম হোৱা নাই আৰু পুষ্কৰৰ দেহত বিহযুক্ত বেজী দিয়াৰ কথা কেৱল উৰাবাতৰিহে । অধিবক্তা পাহৱাই এই গোচৰটোৰ পৰা থাৰুৰক আঁতৰাই ৰখাটো বিচাৰিছিল । তেওঁ যুক্তি দৰ্শাইছিল যে, থাৰুৰে পুষ্কৰক মানসিক বা শাৰীৰিকভাৱে হাৰাশাস্তি কৰা নাছিল ।

উল্লেখ্য যে, ২০১৪ চনৰ ১৭ জানুৱাৰীত সুনন্দা পুষ্কৰক এখন বিলাসী হোটেলৰ কোঠাত মৃত অৱস্থাত পোৱা গৈছিল । ইয়াৰ পাছতে সুনন্দাৰ পৰিয়ালৰ লোকে থাৰুৰৰ বিৰুদ্ধে গোচৰ ৰুজু কৰে । এই অভিয়োগৰ ভিত্তিতে ভাৰতীয় দণ্ডবিধিৰ কেইবাটাও ধাৰাৰ অধীনত শশী থাৰুৰক আৰক্ষীয়ে গ্ৰেপ্তাৰ কৰে ।

লগতে পঢ়ক:ড্ৰোণ আক্ৰমণ সন্দৰ্ভত কি ক'লে জম্মুৰ বায়ু সেনা বাহিনীৰ জোৱানে !