নেশ্যনেল ডেস্ক, 15 জানুৱাৰী:ঘন কুঁৱলীয়ে সমস্যাৰ সৃষ্টি কৰিছে ৰাজধানী দিল্লীত ৷কুঁৱলীৰ পৰিমাণ হ্ৰাস নোপোৱা পৰ্যন্ত দিল্লী বিমানবন্দৰ কৰ্তৃপক্ষই যাত্ৰীসকলক যাত্ৰাৰ পূৰ্বে বিমান সংস্থাসমূহৰ সৈতে যোগাযোগ কৰিবলৈ পৰামৰ্শ আগবঢ়াইছে ৷
Xযোগে বিমানবন্দৰ কৰ্তৃপক্ষই কয়, "ঘন কুঁৱলীৰ বাবে দিল্লী বিমানবন্দৰৰ বিমানৰ কাম-কাজত প্ৰভাৱ পৰিব পাৰে । যাত্ৰীসকলক বিমানৰ আপডেট তথ্যৰ বাবে সংশ্লিষ্ট বিমান সংস্থাটোৰ সৈতে যোগাযোগ কৰিবলৈ অনুৰোধ জনোৱা হৈছে ।" ইয়াৰ পূৰ্বে দেওবাৰে দেশৰ সমগ্ৰ উত্তৰ অংশত কম দৃশ্যমানতা আৰু ঘন কুঁৱলীৰ পৰিস্থিতিয়ে ইণ্ডিগ’ৰ বিমান পৰিচালনাত প্ৰভাৱ পেলাইছিল, যাৰ ফলত বিমান যাত্ৰা কৰা যাত্ৰীসকল অসুবিধাৰ সন্মুখীন হৈছিল ।
ইণ্ডিগ’ এয়াৰলাইন্সৰ এক আনুষ্ঠানিক বিবৃতিত কোৱা হৈছে, "সমগ্ৰ উত্তৰ ভাৰতত হোৱা ঘন কুঁৱলীৰ বাবে দেখা পোৱাৰ ক্ষেত্ৰত সমস্যাৰ সৃষ্টি হৈছিল 2024 চনৰ 14 জানুৱাৰীত আৰু ইয়ে ইণ্ডিগ'ৰ বিমান পৰিচালনাৰ ক্ষেত্ৰত প্ৰভাৱ পেলাইছিল । ইয়াৰ ফলত সমগ্ৰ দিনটোৰেই আমাৰ কাৰ্যকলাপত প্ৰভাৱ পৰিছিল । আমাৰ কৰ্মচাৰীসকলে যাত্ৰীসকলক পূৰ্বৰে পৰা অৱগত কৰিছিল । বিমানবন্দৰসমূহৰ সকলো পলম আৰু বাতিলৰ তথ্য আৰু যাত্ৰীসকলৰ সুবিধাৰ বাবে সকলো প্ৰচেষ্টা চলাইছিলোঁ ।"