নিউজ ডেস্ক,17 মে’: ইতিমধ্যে কেৰালা, কৰ্ণাটক আৰু গোৱাৰ উপকূলীয় অঞ্চলত ধ্বংসলীলা চলাই দেওবাৰে গুজৰাটৰ দিশে গতি কৰে টাউতে ৷ প্ৰচণ্ড ধুমুহাৰ ফলত চাৰিজন লোকে প্ৰাণ হেৰুওৱাৰ বিপৰীতে তচনচ হৈছে বহু বাসগৃহ ৷ ইতিমধ্যে স্থানান্তৰ কৰা হৈছে ঘূৰ্ণী বতাহত প্ৰভাৱিত শতাধিক লোকক ৷ ভাৰতীয় বতৰ বিজ্ঞান বিভাগে টাউতে ঘূৰ্ণী বতাহক অতি ভয়াৱহ বুলি অভিহিত কৰিছে ৷ পৰৱৰ্তী 24 ঘণ্টাত এই ঘূৰ্ণী বতাহৰ ফলত গুজৰাটৰ উপকূলীয় অঞ্চলত ভূমিস্খলন হোৱাৰ সম্ভাৱনা আছে ৷ টাউতে হৈছে এই বছৰৰ প্ৰথমজাক ঘূৰ্ণী বতাহ ৷
ঘূৰ্ণী বতাহ কি ?
ঘূৰ্ণী বতাহক ইংৰাজীত কোৱা হয় চাইক্ল’ন ৷ গ্ৰীক ভাষাৰ চাইক্ল’চ শব্দৰ পৰা উৎপত্তি হৈছে চাইক্ল’ন শব্দৰ ৷ চাইক্ল’চ শব্দৰ অৰ্থ হ’ল কুণ্ডলী পকাই থকা সাপ ৷ ই একপ্ৰকাৰ নিম্ন চাপযুক্ত অঞ্চলত অন্তঃমুখী বলয়ৰে বলা বতাহ ৷ বায়ুমণ্ডলত প্ৰলয় সৃষ্টিকাৰী ঘূৰ্ণী বতাহৰ ফলত জলবায়ুৰ ব্যাপক পৰিৱৰ্তন হোৱা দেখা যায় ৷
টাউতে ঘূৰ্ণী বতাহক নামকৰণ কৰিছে ম্যানমাৰে ৷ বাৰ্মিজ ভাষাত ইয়াৰ অৰ্থ কেঁকো, এটা সৰীসৃপ ৷
ঘূৰ্ণী বতাহ টাউতেৰ ধ্বংসলীলা অব্যাহত কেনেকৈ নামকৰণ কৰা হয় ঘূৰ্ণী বতাহৰ ?
সাধাৰণতে ক্ৰান্তীয় ঘূৰ্ণী বতাহসমূহৰ নামকৰণ কৰা হয় আঞ্চলিক বিধি অনুযায়ী ৷ উদাহৰণস্বৰূপে আটলাণ্টিক, দক্ষিণ গোলাৰ্ধৰ অন্তৰ্গত ভাৰত মহাসাগৰ আৰু দক্ষিণ প্ৰশান্ত সাগৰত সৃষ্টি হোৱা ঘূৰ্ণী বতাহসমূহক ইংৰাজী বৰ্ণমালাৰ ক্ৰম অনুযায়ী তথা পুৰুষ-মহিলা উভয়ৰে ক্ষেত্ৰত ব্যৱহৃত নামেৰে দিয়া হয় ৷
2000 চনত ভাৰত মহাসাগৰৰ উত্তৰাঞ্চলত ঘূৰ্ণী বতাহৰ নামকৰণ প্ৰক্ৰিয়া আৰম্ভ হৈছিল ৷ তেওঁলোকে দেশভিত্তিক নাম-তালিকাবোৰ ইংৰাজী বৰ্ণমালাৰ ক্ৰম অনুযায়ী প্ৰস্তুত কৰিছিল আৰু লিংগ-সমতা অনুযায়ী নামবোৰ প্ৰদান কৰিছিল ৷ বৰ্তমানেও ঘূৰ্ণী বতাহৰ নামকৰণৰ ক্ষেত্ৰত ৰাষ্ট্ৰীয় বতৰ বিজ্ঞান কেন্দ্ৰ আৰু জলবিদ্যুৎ পৰিসেৱাই প্ৰস্তাৱ কৰা তালিকা অনুকৰণ কৰা হয় ৷ অৱশ্যে ভাৰতীয় বতৰ বিজ্ঞান কেন্দ্ৰই সাংস্কৃতিকভাৱে সংবেদনশীল নাম ব্যৱহাৰ নকৰে ৷
বিগত বৰ্ষতো আম্ফান ঘূৰ্ণী বতাহে ভাৰতৰ উপকূলীয় অঞ্চলত তাণ্ডৱ চলাইছিল ৷ একেদৰে ফেনীয়েও তাণ্ডৱ সৃষ্টি কৰিছিল পশ্চিমবংগ আৰু ওড়িশাকে ধৰি একাংশ অঞ্চলত ৷
ক’ত কেনেদৰে ক্ষতিসাধন কৰিছিল আম্ফান আৰু ফেনীয়ে ?
বিগত বৰ্ষত আম্ফানে পশ্চিমবংগত অতি কমেও ৭৭ গৰাকী লোকৰ প্ৰাণকাঢ়ি লৈছিল ৷ এই ঘূৰ্ণী বতাহৰ ফলত পশ্চিমবংগৰ উত্তৰ আৰু দক্ষিণ ২৪ পৰগণা, পূৱ আৰু পশ্চিম মেদিনীপুৰ, কলকাতা, হাওড়া আৰু হুগলী জিলাৰ আন্তঃগাঁথনি, চৰকাৰী আৰু বেচৰকাৰী সম্পদৰ ব্যাপক ক্ষতিসাধন হৈছিল ৷ ঠিক একেদৰে ওড়িশাৰ উপকূলীয় অঞ্চলতো আম্ফানে যথেষ্ট ক্ষতিসাধন কৰিছিল যদিও কোনো লোকৰ প্ৰাণহানি হোৱা নাই ৷ তদুপৰি এই আম্ফানে চুবুৰীয়া ৰাষ্ট্ৰ বাংলাদেশতো 12 জনৰ প্ৰাণ কাঢ়িছিল ৷
ঠিক একেদৰে ফেনীয়ে ভাৰতত প্ৰাণ লৈছিল 72 গৰাকী লোকৰ ৷ ইয়াৰে 64 গৰাকী লোকেই আছিল ওড়িশাৰ ৷ ওড়িশা আৰু পশ্চিমবংগত ফেনীয়ে বিস্তৰ ক্ষতিসাধন কৰিছিল ৷ ঠিক একেদৰে ফেনীয়ে চুবুৰীয়া ৰাষ্ট্ৰ বাংলাদেশতো 17 জন লোকৰ প্ৰাণ কাঢ়িছিল ৷
লগতে পঢ়ক:নাৰদা কেলেংকাৰী : কেবিনেট মন্ত্ৰীসহ টিএমচিৰ নেতাক গ্ৰেপ্তাৰ চিবিআইৰ
