নেশ্যনেল ডেস্ক, ৮ জুন :ভাৰতৰ বতৰ বিজ্ঞান বিভাগে বুধবাৰে উল্লেখ কৰা মতে, অহা ১২ ঘণ্টাৰ ভিতৰত ‘বিপাৰজয়’ ঘূৰ্ণীবতাহৰ ধুমুহা তীব্ৰতৰ হৈ পৰিব ৷ বিশেষকৈ পূব-মধ্য আৰু কাষৰীয়া দক্ষিণ-পূব আৰব সাগৰৰ ওপৰত অতি ভয়াৱহ ঘূৰ্ণীবতাহ ধুমুহালৈ পৰিণত হ’ব ।
আই এম ডিয়ে (India Meteorological Department) এটা টুইটত কয় যে পূব-মধ্য আৰু সংলগ্ন দক্ষিণ-পূব আৰব সাগৰৰ ওপৰত হোৱা ভয়াৱহ ঘূৰ্ণীবতাহ ধুমুহা ‘BIPARJOY’ যোৱা ৬ ঘণ্টাৰ ভিতৰত ঘণ্টাত ৫ কিলোমিটাৰ বেগত প্ৰায় উত্তৰ দিশলৈ গতি কৰিছিল আৰু অতি সোনকালে ই এক ভয়াৱহ ঘূৰ্ণীবতাহৰ ধুমুহালৈ পৰিণত হৈছিল ।
আইএমডি আহমেদাবাদৰ পৰিচালক মনোৰমা মহন্তই সংবাদ মাধ্যমৰ আগত কয় যে এই ঘূৰ্ণীবতাহৰ কেন্দ্ৰবিন্দু পোৰবন্দৰ জিলাৰ পৰা প্ৰায় ১০৬০ কিলোমিটাৰ দক্ষিণ-পশ্চিমে অৱস্থিত । তেওঁ কয় যে উপকূলীয় জিলাসমূহত ঘূৰ্ণীবতাহৰ ফলত ঘণ্টাত ৪০ ৰ পৰা ৫০ কিলোমিটাৰ বেগেৰে বতাহ বোৱাৰ সম্ভাৱনা আছে ।
ধুমুহাৰ বাবে বেয়া বতৰ আৰু সাগৰৰ অৱস্থাই অহা তিনি-চাৰি দিনৰ ভিতৰত ১৩৫-১৪৫ কিলোমিটাৰ প্ৰতি ঘণ্টাৰ পৰা ১৬০ কিলোমিটাৰলৈ বৃদ্ধি পোৱাৰ সম্ভাৱনা আছে । সেয়ে বতৰ বিজ্ঞান বিভাগে মাছমৰীয়াসকলক সাগৰত মাছ ধৰাৰ পৰা বিৰত থাকিবলৈ অনুৰোধ জনায় ৷
লগতে বতৰ বিজ্ঞান বিভাগে মাছমৰীয়াসকলক ১৪ জুনলৈকে আৰব সাগৰত নানামিবলৈ সকীয়নি প্ৰদান কৰে । আইএমডিৰ এজন বিষয়াই জনোৱা মতে, এই ঘূৰ্ণীবতাহৰ ফলত ৯ ৰ পৰা ১১ জুনৰ ভিতৰত সৌৰাষ্ট্ৰ আৰু দক্ষিণ গুজৰাট অঞ্চলত লঘু বৰষুণ হোৱাৰ সম্ভাৱনা আছে ।
প্ৰাকৃতিক দুৰ্যোগৰ সৈতে মোকাবিলা কৰিবলৈ সম্পূৰ্ণৰূপে সাজু গুজৰাট চৰকাৰ :
যিহেতু ঘূৰ্ণীবতাহ ‘বিপাৰজয়’ৰ কেন্দ্ৰবিন্দু গুজৰাটৰ পোৰবন্দ, সেয়ে যিকোনো সম্ভাব্য প্ৰাকৃতিক দুৰ্যোগৰ সৈতে মোকাবিলা কৰিবলৈ সম্পূৰ্ণৰূপে সাজু হৈছে গুজৰাট চৰকাৰ । ৰাহত আয়ুক্ত আলোক কুমাৰ পাণ্ডেই সংবাদ মাধ্যমৰ আগত কয় যে বাৰিষাৰ সময়ত সম্ভাব্য প্ৰাকৃতিক দুৰ্যোগৰ সৈতে মোকাবিলা কৰিবলৈ ইতিমধ্যে সকলো প্ৰকাৰে ৰাজ্যৰ প্ৰশাসন ব্যৱস্থা সাজু হৈছে । চিন্তাৰ বিশেষ কোনো কাৰণ নাই ৷
ক’ৰ পৰা ঘূৰ্ণীবতাহ বিপাৰজয় কিমান দূৰ ?
আই এম ডিৰ মতে, অতি ভয়াৱহ ঘূৰ্ণীবতাহৰ ধুমুহা বৰ্তমান গোৱাৰ পৰা প্ৰায় ৮৬০ কিলোমিটাৰ পশ্চিম-দক্ষিণ-পশ্চিম, মুম্বাইৰ পৰা ৯৭০ কিলোমিটাৰ দক্ষিণ-পশ্চিম, পোৰবন্দৰৰ পৰা ১০৬০ কিলোমিটাৰ দক্ষিণ-দক্ষিণ-পশ্চিম আৰু কৰাচীৰ পৰা ১৩৫০ কিলোমিটাৰ দক্ষিণে অৱস্থিত ।
অহা ২৪ ঘণ্টাত প্ৰায় উত্তৰ দিশলৈ আৰু তাৰ পিচত ৩ দিনৰ ভিতৰত উত্তৰ-উত্তৰ-পশ্চিম দিশলৈ ঘূৰ্ণীবতাহ গতি কৰিব বুলি উল্লেখ কৰে আই এম ডিয়ে । এই ঘূৰ্ণীবতাহটোৱে কেতিয়া আৰু ক’ত স্থলভাগত প্ৰৱেশ কৰিব পাৰে সেয়া এতিয়াও স্পষ্ট হোৱা নাই । বতৰ বিজ্ঞান বিভাগৰ তথ্য অনুসৰি, চলিত সপ্তাহৰ শেষৰ ফালে ইয়াৰ অৱস্থা স্পষ্ট হ’ব ।
কিয় এই ঘূৰ্ণীবতাহৰ নাম 'বিপাৰজয়' ?
বাংলাদেশে এই ঘূৰ্ণীবতাহৰ নাম ৰাখিছে বিপাৰজয় । বিপাৰজয় শব্দৰ অৰ্থ হৈছে ‘বিপৰ্যয়’ বা ‘দুৰ্যোগ’। তথ্য অনুসৰি ২০২০ চনত বিশ্ব বতৰ বিজ্ঞান সংস্থাই এই নামটো স্বীকৃতি দিছিল । বিশ্ব বতৰ বিজ্ঞান সংস্থা আৰু ৰাষ্ট্ৰসংঘৰ অৰ্থনৈতিক আৰু সামাজিক আয়োগৰ সদস্য দেশসমূহত ঘূৰ্ণীবতাহৰ নামকৰণৰ ব্যৱস্থা আছে ।
বিশ্ব বতৰ বিজ্ঞান সংস্থাৰ তথ্য অনুসৰি আটলাণ্টিক আৰু দক্ষিণ গোলাৰ্ধত (ভাৰত মহাসাগৰ আৰু দক্ষিণ প্ৰশান্ত মহাসাগৰীয় অঞ্চল) গ্ৰীষ্ম মণ্ডলীয় ঘূৰ্ণীবতাহৰ নাম বৰ্ণানুক্ৰমে দিয়া হৈছে । এই নামবোৰ নাৰী আৰু পুৰুষৰ নামেৰে নামাকৰণ কৰা হৈছে । আনহাতে, উত্তৰ ভাৰত মহাসাগৰৰ দেশসমূহৰ ঘূৰ্ণীবতাহৰ নাম বৰ্ণানুক্ৰমিকভাৱে তালিকাভুক্ত কৰা হৈছে । এই নামবোৰ লিংগ নিৰপেক্ষ ।
বাৰিষাৰ আগমনত বিপৰজয়ৰ প্ৰভাৱ :
বতৰ বিজ্ঞান বিভাগে জনাইছে যে এই ধুমুহাৰ বাবে ভাৰতত বাৰিষাৰ আগমনত পলম হ’ব পাৰে । অৱশ্যে ব্যক্তিগত বতৰ পূৰ্বাভাস সংস্থা ‘‘স্কাইমেট ৱেদাৰ’’ই জনোৱা মতে, কেৰালাৰ বাৰিষা ৮ বা ৯ জুনত আৰম্ভ হ’ব পাৰে । কিন্তু এই সময়ত সামান্য বৰষুণৰ সম্ভাৱনা আছে ।
স্কাইমেট ৱেদাৰৰ তথ্য অনুসৰি, আৰব সাগৰৰ ওপৰত বিপাৰজয়ৰ প্ৰবল ঘূৰ্ণীবতাহৰ বাবে ভাৰতৰ অভ্যন্তৰীণ অঞ্চলত বাৰিষাৰ আগমন প্ৰভাৱিত হৈছে । ইয়াৰ প্ৰভাৱত বাৰিষা উপকূলীয় অঞ্চলত উপনীত হ’ব পাৰে ৷
লগতে পঢ়ক :Mission 2024: 23 জুনত অনুষ্ঠিত হ’ব বিৰোধী ঐক্য বৈঠক
