নিউজ ডেস্ক, 6 ফেব্ৰুৱাৰী : শনিবাৰৰ দিনটোতে ইতিহাস ৰচনা কৰি ভাৰতীয় সামৰিক-অৰ্ধসামৰিক বাহিনীত প্ৰথমবাৰৰ বাবে সংযোজন কৰা হ’ল দেশৰ প্ৰথমটো পূৰ্ণকালীন মহিলা কামাণ্ডো বেটালিয়ন ৷ বিশ্বৰ সৰ্ববৃহৎ অৰ্ধসামৰিক বাহিনী; ভাৰতৰ কেন্দ্ৰীয় সংৰক্ষিত আৰক্ষী বাহিনীৰ 88 নং মহিলা বেটালিয়নৰ 35 সংখ্যক স্থাপনা দিৱসৰ দিনটোতে চিআৰপিএফৰ কোব্ৰা বেটালিয়নত আনুষ্ঠানিকভাৱে নিয়োগ কৰা হয় ব্ৰাছ বেণ্ডসহ মহিলা কামাণ্ডোৰ দলটো ৷
লগতে পঢ়ক :জয় হিন্দ: ইটিভি ভাৰত আৰু চিআৰপিএফৰ সৈতে গণৰাজ্য দিৱস বিশেষ
দেশৰ তথা বিশ্বৰ প্ৰথমটো মহিলা অৰ্ধসামৰিক বেটালিয়ন হিচাপে চিআৰপিএফৰ 88 বেটালিয়নক আজিৰ দিনটোতে 35 বৰ্ষ পূৰ্বে সেৱাত নিয়োজিত কৰি প্ৰতিষ্ঠা কৰা হৈছিল ৷ গুৰগাঁওস্থিত বেটালিয়ন মুখ্যালয়ত শনিবাৰে অনুষ্ঠিত হোৱা স্থাপনা দিৱস কাৰ্যসূচীতে বেটালিয়নৰ 6 টাকৈ কোম্পানীৰ 34 গৰাকী মহিলা কামাণ্ডোক 3 মাহযোৰা কঠোৰ প্ৰশিক্ষণৰ অন্তত চিআৰপিএফৰ কোব্ৰা বাহিনীত সংযোজিত কৰা হয় ৷
তিনিমাহৰ প্ৰশিক্ষণত তেওঁলোকক স্বয়ংচালিত অত্যাধুনিক অস্ত্ৰ প্ৰণালী, অত্যাধুনিক আৰু কঠোৰ সমৰ-কলা তথা জংঘল জীৱন যাপন, বিস্ফোৰক, নক্সা নিৰীক্ষণ আদি বিভিন্ন প্ৰশিক্ষণ প্ৰদান কৰা হৈছিল আৰু আজি অনুষ্ঠিত হোৱা স্থাপনা দিৱসত কোব্ৰাৰ পুৰুষ কামাণ্ডোৰ সমান্তৰালকৈ এইসকল মহিলা কামাণ্ডোৱে এতিয়াৰে পৰা চুকমা, ডান্টেৱাৰা আদিৰ দৰে নক্সাল অধ্যুষিত অঞ্চলত কৰ্তব্যত নিয়োজিত হ’ব বুলি জানিবলৈ দিয়ে চিআৰপিএফে ৷