নেশ্যনেল ডেস্ক,১৯ এপ্ৰিল: সমগ্ৰ দেশৰ লগতে পশ্চিমবংগতো কৰ'ণাৰ সংক্ৰমণ বৃদ্ধি পাবলৈ ধৰিছে । ৰাজ্যখনত বৰ্ধিত সংক্ৰমণৰ প্ৰতি লক্ষ্য ৰাখি পশ্চিমবংগ চৰকাৰে গ্ৰহণ কৰিছে এক সিদ্ধান্ত । ৰাজ্য চৰকাৰখনে বিদ্যালয়সমূহৰ আগতীয়াকৈ গৰম বন্ধ ঘোষণা কৰিছে । মঙলবাৰৰ পৰা অনিৰ্দিষ্টকাললৈ ৰাজ্যখনৰ সকলো বিদ্যালয় বন্ধ কৰাৰ সিদ্ধান্ত গ্ৰহণ কৰিছে চৰকাৰে । সাধাৰণতে মে' মাহৰ প্ৰথম সপ্তাহৰ পৰা বিদ্যালয়সমূহত গৰম বন্ধ আৰম্ভ হয় ।
চলিত বৰ্ষৰ ফেব্ৰুৱাৰীৰ মাজভাগৰ পৰা নৱম, দশম, একাদশ আৰু দ্বাদশ শ্ৰেণীসমূহৰ পাঠদান আৰম্ভ হৈছিল । শেহতীয়াকৈ কৰ'ণাৰ দ্বিতীয় ঢৌৰ গ্ৰাসৰ বাবে আগতীয়াকৈ গৰম বন্ধ ঘোষণা কৰিবলৈ বাধ্য হোৱা বুলি চৰকাৰৰ তৰফৰ পৰা জনোৱা হৈছে । শিক্ষামন্ত্ৰী পাৰ্থ চেটাৰ্জীয়ে ব্যক্তিগত বিদ্যালয়সমূহকো এই নিয়ম অনুসৰণ কৰিবলৈ অনুৰোধ জনাব বুলি কয় । এই সন্দৰ্ভত শিক্ষা বিভাগে সোমবাৰে প্ৰয়োজনীয় জাননী জাৰি কৰিব বুলি ৰাজ্যখনৰ শিক্ষামন্ত্ৰী পাৰ্থ চেটাৰ্জীয়ে সদৰী কৰিছে ।