তেজপুৰ, 28 জুলাই:মণিপুৰৰ হিংসাত্মক ঘটনাই আজি 86 দিনত ভৰি দিলে ৷ এতিয়াও পৰিস্থিতি নিয়ন্ত্ৰণলৈ অহা নাই সমগ্ৰ মণিপুৰত । ৰাজ্যখনৰ বিভিন্ন স্থানৰ পৰা বাসগৃহত দুৰ্বৃত্তই অগ্নিসংযোগ কৰাৰ ঘটনাও পোহৰলৈ আহিছে ৷
বিগত 24 ঘণ্টাত সুৰক্ষা বাহিনী আৰু উগ্ৰপন্থীৰ মাজত সংঘটিত গুলীয়াগুলীত দুজন সুৰক্ষাকৰ্মী গুৰুতৰভাৱে অহাত হৈছে ৷ ইয়াৰ মাজতে বৃস্পতিবাৰে বিয়লি মণিপুৰৰ প্ৰাক্তন মুখ্যমন্ত্ৰী তথা বিধানসভাৰ চি এল পি দলৰ নেতা ওকৰাম ইববী সিঙে ৰাজ্যপাল অনুসূয়া উইকিক সাক্ষাৎ কৰি জৰুৰীকালীন বিধানসভা আহ্বান কৰাৰ বাবে আবেদন কৰে ৷
উল্লেখ্য যে জৰুৰীকালীন বিধানসভা সংবিধানৰ 174 (1)ৰ অধীনত ৰাজ্যপালে জৰুৰীকালীন অৱস্থাত আহ্বান কৰিব পাৰে ৷ ইববী সিঙে ৰাজ্যপালক মণিপুৰৰ এই অগ্নিগৰ্ভা পৰিস্থিতিত শান্তি আনিবলৈ চৰকাৰ-বিৰোধী উভয় পক্ষই আলোচনা কৰাৰ প্ৰয়োজনীয় আহি পৰিছে জনায় ৷ মন কৰিব লগীয়া যে কংগ্ৰেছ দলৰ পৰা এইয়া তৃতীয়বাৰৰ বাবে জৰুৰীকালীন বিধানসভা অনুষ্ঠিত কৰাৰ বাবে দাবী জনাইছে ৷