নিউজ ডেস্ক, ২৬ ছেপ্টেম্বৰ : সোমবাৰে ভূপালত বিজেপি কৰ্মীসকলক সম্বোধন কৰা প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰে কংগ্ৰেছে । মঙলবাৰে কংগ্ৰেছে কয় যে প্ৰধানমন্ত্ৰীয়ে তেওঁৰ ৫১ মিনিটৰ দীঘল ভাষণৰ সময়ত ৪৪ বাৰ দেশৰ সবাতোকৈ পুৰণি দলটোৰ নাম লয় । লগতে কংগ্ৰেছে আশ্চৰ্য প্ৰকাশ কৰে যে প্ৰধানমন্ত্ৰী কিয় কংগ্ৰেছ দলটোৰ দ্বাৰা ইমান আকৰ্ষিত হৈছে ।
"বিজেপিয়ে ১৮ বছৰৰো অধিক সময় ধৰি শাসন কৰি থকা মধ্যপ্ৰদেশৰ ভূপালত কালি প্ৰধানমন্ত্ৰী মোদীয়ে ৫১ মিনিট ধৰি বিজেপিৰ জয়গান গায় । কিন্তু তেওঁৰ ভাষণৰ সকলোতে আছিল 'কংগ্ৰেছ', 'কংগ্ৰেছ' । তেওঁ কংগ্ৰেছ দলৰ নাম ৪৪ বাৰ পুনৰাবৃত্তি কৰে; সেয়া প্ৰায় ৪৪ মিনিট ধৰি । তেওঁ কংগ্ৰেছৰ দ্বাৰা ইমান আকৰ্ষিত কিয় হৈছে ?" যুৱ কংগ্ৰেছৰ সভাপতি শ্ৰীনিবাস বিয়ে এক্সত (পূৰ্বৰ টুইটাৰ) এনেদৰে লিখিছে ।
উল্লেখ্য যে চলিত বৰ্ষত মধ্যপ্ৰদেশত অনুষ্ঠিত হ'বলগীয়া বিধানসভা নিৰ্বাচনৰ পূৰ্বে বিজেপিয়ে ব্যাপক সমৰ্থন আদায়ৰ লক্ষ্যৰে ভূপালত 'কাৰ্যকৰ্তা মহাকুম্ভ' আয়োজন কৰিছে । এই অনুষ্ঠান সম্বোধন কৰি প্ৰধানমন্ত্ৰী নৰেন্দ্ৰ মোদীয়ে সমগ্ৰ দেশতে 'নেতিবাচকতাৰ ভাইৰাছ' বিয়পোৱাৰ বাবে প্ৰতিদ্বন্দ্বী দলটোক দোষাৰোপ কৰি কংগ্ৰেছক এক ভাইৰাছ বুলি তীব্ৰ আক্ৰমণ কৰে ।